له‌دوای كه‌وتنه‌خواره‌وه‌ی فڕۆكه‌یه‌كی نفه‌ر هه‌ڵگری جۆری “ئێرباص”ی ڕووسی له‌ئاسمانی ناوچه‌ی سینای میسردا. كه‌به‌هۆیه‌وه‌ هه‌موو سه‌رنشینه‌كانی فڕۆكه‌كه‌ گیانیان له‌ده‌ستدا، له‌ئێستادا مشتومڕێكی زۆرله‌ مۆسكۆدا هه‌یه‌ سه‌باره‌ت به‌وه‌ی “باراك ئۆباما” ی سه‌رۆكی وڵاته‌ یه‌كگرتووه‌كانی ئه‌مریكا هیچ جۆره‌ بروسكه‌یه‌كی ماته‌مینی نه‌ناردووه‌،یان په‌یوه‌ندی ته‌له‌فۆنی له‌گه‌ڵ هاوتا ڕووسیه‌كه‌یدا به‌و بۆنه‌یه‌وه‌ ئه‌نجام نه‌داوه‌.


له‌م میانه‌یه‌دا پرسیاری زۆر ده‌كرێن له‌سه‌ر ئه‌وه‌ی بۆچی سه‌رۆكی ئه‌مریكا هیچ جۆره‌ په‌یوه‌ندییه‌كی به‌وئاراسته‌یه‌دا له‌گه‌ڵ هاوتا ڕووسیه‌كه‌یدائه‌نجام نه‌داوه‌. له‌كاتێكدا زۆرترین به‌دواداچوونی ئه‌و كه‌یسه‌ له‌لایه‌ن میدیاكانی ئه‌مریكاوه‌ ئه‌نجام ده‌درێن.

له‌وباره‌یه‌وه‌ وته‌بێژی فه‌رمی”كرملین” به‌ په‌یامنێرانی ڕاگه‌یاند: ” جۆنی كیری وه‌زیری ده‌ره‌وه‌ی ئه‌مریكا به‌ته‌له‌فۆن په‌یوه‌ندی به‌ سێرگی لاڤرۆڤه‌وه‌ كردووه‌و، به‌ناوی گه‌لی ئه‌مریكاوه‌ هاوخه‌می بۆ گه‌لی ڕووسیا ده‌ربڕیوه‌”.


ئه‌وه‌ له‌كاتێكدایه‌ كه‌ په‌یوه‌ندییه‌كانی ئه‌مریكاو ڕووسیا به‌هۆی ده‌ستتێوه‌ردانه‌كانی ڕووسیاوه‌ له‌ كێشه‌ی سوریادا، به‌ره‌و نزمترین ئاست چوون. بۆیه‌ به‌لای هه‌ندێك له‌چاودێرانه‌وه‌، ده‌رنه‌بڕینی هاوخه‌می بۆقوربانییه‌كانی فڕۆكه‌ ڕووسییه‌كه‌، نیشانه‌ی ڕوونه‌ له‌سه‌ر نزمی په‌یوه‌ندییه‌كانی هه‌ردوو وڵات له‌م كاته‌دا.




باسنيوز