ژماره‌یه‌كی دیكه‌ی په‌نابه‌ران كه‌ ژماره‌یان به‌ 10 هه‌زار كه‌س مه‌زه‌نده‌ ده‌كرێت گه‌یشتنه‌ نه‌مسا ، ئه‌مه‌ش له‌ كاتێكدایه‌ ناكۆكی له‌ نێوان وڵاتانی یه‌كێتی ئه‌وروپا هه‌یه‌ له‌ چۆنیه‌تی مامه‌ڵه‌كردن له‌ گه‌ڵ ئه‌م قه‌یرانه‌ .

په‌نابه‌ران دوای ئه‌وه‌ی له‌ كرواتیاوه‌ گه‌یشتنه‌ هه‌نگاریا كه‌ نزیكه‌ی 20 هه‌زار په‌نابه‌ر ده‌بوون ، به‌ڵام هه‌نگاریا رایگه‌یاند كه‌ ناتوانێت مامه‌ڵه‌یان له‌گه‌ڵ بكات و په‌نابه‌رانیش خاكی ئه‌و وڵاته‌یان جێهێشت .

پۆلیسی نه‌مسا روونیكرده‌وه‌ كه‌ نۆ هه‌زار په‌نابه‌ر هاتوونه‌ته‌ ناو وڵاته‌كه‌یان و پێشبینیش ده‌كرێت ژماره‌كه‌ بۆ 10 هه‌زار په‌نابه‌ر به‌رز بێته‌وه‌ .

چاوه‌ڕوان ده‌كرێت یه‌كێتی ئه‌وروپا هه‌فته‌ی داهاتوو لوتكه‌یه‌كی به‌ په‌له‌ ببه‌ستێت بۆ تاوتۆیكردنی قه‌یرانی په‌نابه‌ران .