به‌رپرسانى كۆشكى سپى ئاشكرایانكرد، باراك ئۆباما سه‌رۆكى ئه‌مه‌ریكا پایه‌ندبوونى واشنتۆن بۆ هاوكارى و یارمه‌تى له‌ هه‌ر رووبه‌ڕبوونه‌وه‌یه‌كى هه‌ڕه‌شه‌ى ئه‌منى ئێران بۆ شا سه‌لمان شاى سعوودیه‌، دووپات ده‌كاته‌وه‌، ئه‌مه‌ش پاش ئه‌وه‌ دێت كه‌ هاوپه‌یمانانى واشنتۆن له‌ وڵاتانى كه‌نداو هه‌ست به‌ نیگه‌رانى زۆر له‌ رێككه‌وتن ئه‌تۆمی له‌گه‌ڵ ئێران ده‌كه‌ن، چونكه‌ وڵاتانى كه‌نداو پێیان وایه‌، به‌و رێككه‌وتنه‌، ئێران هه‌ژموونى خۆى له‌ ناوچه‌كه‌ پته‌وتر ده‌كات.

به‌رپرسه‌كانى كۆشكى سپى ئاماژه‌یان به‌وه‌شداوه‌، ئۆباما هه‌ینى له‌ كۆشكى سپى پێشوازى له‌ شا سه‌لمان ده‌كات و هه‌وڵده‌دات، مه‌ترسى و نیگه‌رانییه‌كانى وڵاتانى عه‌ره‌بى له‌به‌رامبه‌ر مه‌ترسى و هه‌ڕه‌شه‌كانى ئێران له‌ ناوچه‌كه‌ بڕه‌وێنێته‌وه‌ و پێشى راده‌گه‌یه‌نێت، كه‌ واشنتۆن هیچ كاتێك رێگه‌ نادات ئێران ببێت به‌ مه‌ترسى و هه‌ڕه‌شه‌ بۆ تێكدان و شڵه‌ژانى سه‌قامگیرى له‌ ناوچه‌كه‌.

بڕیاره‌ سبه‌ى هه‌ینى، شا سه‌لمان بن عه‌بدولعه‌زیز شاى سعودیه‌ سه‌ردانى ئه‌مه‌ریكا بكات و له‌گه‌ڵ ئۆباماش چه‌ند پرس و بابه‌تێكى گرنگ تایبه‌ت به‌ ناوچه‌ى رۆژهه‌ڵاتى ناوه‌ڕاست تاوتوێ بكات.