به‌ره‌به‌یانی ئه‌مڕۆ ئه‌نجامی به‌رایی ئه‌نجامی گه‌ڕی یه‌كلاكه‌ره‌وه‌ی هه‌ڵبژاردنی سه‌رۆكایه‌تی میسر ڕاگه‌یه‌ندراو به‌ گوێره‌ی ئه‌نجامه‌كانیش كاندیده‌كه‌ی ئیخوان موسلیمین (د.محه‌مه‌د مورسی) سه‌ركه‌وتنێكی گه‌وره‌ی به‌ده‌ستهێناوه‌ و بوو به‌ یه‌كه‌مین سه‌رۆكی هه‌ڵبژێردراو له‌ مێژووی میسردا.

به‌ گوێره‌ی ئه‌نجامه‌ به‌راییه‌كان (مورسی) به‌ جیاوازی زیاتر له‌ یه‌م ملیۆن و 200 هه‌زار ده‌نگ پێش ڕكابه‌ره‌كه‌ی (ئه‌حمه‌د شه‌فیق)ـی دوایین سه‌رۆكوه‌زیرانی سه‌رده‌می (حوسنی موباره‌ك) كه‌وتووه‌.

وایش بڕیاره‌ نیوه‌ڕۆی ئه‌مڕۆ به‌ ڕه‌سمی ئه‌نجامه‌ كۆتاییه‌كان له‌لایه‌ن ده‌سته‌ی باڵای هه‌ڵبژاردنه‌كانه‌وه‌ ڕابگه‌یه‌ندرێت.

(محەممەد مورسی)

- ناوی تەواوی (محەممەد محەممەد مرسی عیسا ئەلعەیات)ـە و لە ساڵی 1951 لە دایك بووە.

- لە ساڵی 1975 كۆلێژی ئەندازیاری لە زانكۆی قاهیرە تەواو كردووە و لە ساڵی 1978ـیشدا بڕوانامەی بەكالۆریۆسی لە هەمان بوار و هەمان زانكۆ وەرگرتووە. لە ساڵی 1982 بڕوانامەی لە بواری ئەندازیاریدا لە زانكۆی “باشووری كالیفۆرنیا”ـی ئەمەریكا وەرگرتووە.

- لە نێوان ساڵانی 1982 و 1985 لە زانكۆی هەرێمی كالیفۆرنیا وانەی گوتووەتەوە. لە ساڵی 1985 گەڕاوەتەوە میسر و لە زانكۆی زقازیق دەستی بە وانەگوتنەوە كردووە.

- لە ساڵی 2000 تاوەكو 2005 ئەندامی پەرلەمانی وڵات بووە، بەڵام وەكو كاندیدێكی سەربەخۆ، چونكە ئەندامانی ئیخوان موسلمین لە سەردەمی (حوسنی موبارەك)ـدا ڕێگەیان پێنەدەدرا هیچ جۆرە پۆستێكیان هەبێت.

- لەگەڵ دامەزراندنی پارتیی ئازادیی و دادپەروەری لە لایەن گرووپی ئیخوان موسلمینەوە لە ساڵی 2001ـدا، ناوبراو بوو بە سەرۆكی پارتەكە.