Ew perestgehên Kurdên Êzidî ku 5 sal berî niha li Şingalê û derdora wê di êrîşa DAIŞê de wêran bûbûn, heta niha nehatine nûjenkirin. Nûjenkirina wan peretgehan, piştî dîtina kesûkarên wan, bûye xem û xewneke mezin a Kurdên Êzidî

Ji dema êrîşa DAIŞê ve bo ser Şingalê û navçeyên derdora wê, çendîn perestgehên Kurdên Êzidî ji aliyê DAIŞê ve hatine rûxandin û heta niha herifî mane û nehatine nûjenkirin.

Ji 29 mezargehên Kurdên Êzidî tenê hejmarek kêm ji wan avedan mane û yên din ji aliyê DAIŞê ve hatine rûxandin.

Yek ji şêxên Êzidiyan, Şêx Îsmaîl ji Rûdawê re dibêje: "Spas ji Xwedê re, tevî ku DAIŞê beşek ji perestgehên me rûxandin, lê belê hejmarek perestgehên me avedan mane û em li van deran duayên xwe dikin."

Şingal niha di kontrola hikûmeta Iraqê de ye. Kurdên Êzidî gazinan li herdu hikûmetên Iraqê û Herêma Kurdistanê dikin, ku heta niha bi awayekê cidî kar ji bo nûjenkirina wan mezargeh û perestgehan nekirine.

Kurdên Êzidî dibêjin, heta niha wek pêwîst hevkariya wan nehatiye kirin û ti awirek li wan nehatiye dayîn. Daxwaz dikin ku hikûmet û rêxistinên mirovî bi hewara wan ve biçin û di vê rewşa ku ew têde ne hevkariya wan bikin.

Di meha Tebaxa 2014an çekdarên DAIŞê êrîşî Şingalê kirin, piraniya perestgehên Kurdên Êzidî wêran kirin, bi hezaran kes kuştin û 6,417 kes ji wan jî revandin ku piraniya wan jin û zarok bûn.

Nêçîrvan Barzanî di dema serokwezîriya xwe de ofîsek taybet ji bo rizgarkirina wan revandiyên Kurdên Êzidî damezrand û bi hewldanên wê ofîsê, zêdetir ji 3,500 kes ji wan revandiyan hatin rizgarkirin.

Di meha Tebaxa 2014an de, çekdarên DAIŞê êrîşî Şingalê kiribûn, û piraniya perestgehên Kurdên Êzidî wêran kiribûn, û heta niha ew perstgeh nehatine nûjenkirin, herwiha alîkariya wan kesên li wê derê dijîn jî nehatiye kirin.

Kurdên Êzidî jî dibêjin, heta niha wek pêwîst hevkariya wan nehatiye kirin û daxwaz dikin, ku hikûmet û rêxistinên mirovî bi hewara wan ve biçin, û di vê rewşa ku tê de ne, alîkariya wan bikin.

Rudaw