(*)

 

١٦ی ئاب بیرهاتنەکا مەزن و دیارە د دیرۆکا خەبات و رزگاریخوازی یا گەلێ کورد دا. ئەڤ ڕۆژە بتنێ بیرهاتنەکا سالانە نینە ل سەر سالنامێ، بەلکو هێمایەکێ مەزن و زیندی یێ ئیرادێ، بەردەوامیا ململانێیێ و خۆڕاگریا گەلەکێیە کو د ناڤ هەمی سەردەمێن گرران و دژوار دا سەرێ خۆ نەچەماندیە دا کو مافێن خۆ، نەتەوە و ناسنامەیا خۆ یا نیشتمانی بپارێزیت.

ژ دەمێ دامەزراندنا پارتی دیموکراتی کوردستان و هەتا ئەڤرۆ، ئەڤ کاروانە د ڕێکا خەباتا مەزن دا ژ پێخەمەت بەرگریکرنێ ژ مافێن ڕەوا یێن گەلێ کوردستانێ بەردەوام بوویە. د ڤێ ڕێکا دژوار و دوورو درێژ دا، هەزاران کچ و کوڕێن قارەمان یێن ڤی وەلاتی بووینە قوربانی و گیانێ خۆ پێشکێش کری ب مەرەما وێ چەندێ ئالا کوردستانێ سرفراز و بلند بمینیت و کەرامەتا گەلێ مە پاراستی بیت.

پارتی دیموکراتی کوردستان چ جارەکێ بتنێ ڕێکخستنەکا سیاسی یا تەنگ نەبوویە کو خۆ د ناڤ چوارچۆڤەکێ دیارکری دا بگرێت. بەلکو پارتی سیبەرەکا مەزن و بەرفرەها کۆمڤەکرنێیە بۆ هەموو چین و تەخ و توێژێن جڤاکی، ئۆل و ئاین و هەموکی پێکهاتێن جۆراوجۆر یێن کوردستانێ. هەمی پارچەیێن ڤی جڤاکی، بێ جیاوازی، خۆ د ناڤ ڤێ سیبەرێ دا دبینن و هەست ب ئارامی و پشتڕاستیێ دکەن.

خەم و ڕێبازا ڤی ئاگرێ کوردایەتیێ، خەما وەلاتپارێزیێ و دلسۆزیا ڕاستەقینەیە بۆ خاک و ئاخا نیشتمانی. ئەڤرۆ ژی هەبوونا پارتیا ب هێز، پێدڤیەکا بنەڕەتی و گرنگە بۆ پاراستنا دەستکەفتێن هەول و خەباتا دهان سالان و بەهێزکرنا کوردستانێ. چونکی بەرەڤ پێشچوونا کوردستانێ ل ناڤخۆ دێ بیتە ئەگەرا وێ چەندێ کو دەنگ و شیانێن بەرگریکرنێ ژ مافێن گەلێ مە ل ئاستێ ناڤخۆیی و نیڤدەولەتی ب هێزتر لێ هێت.

ئەم د ڤێ ڕۆژا پیرۆز دا ڕێزێ ل خەبات و قوربانیێن گەلێ کورد دەینین و پەیاما بەردەوامبوونێ نوو دکەینەڤە. هیڤی و ئارمانجا مە ئەوە کو نەوەیێن پاشەڕۆژێ یێن ڤی وەلاتی د ژیانەکا ئارام، سەقامگیر و پڕ ژ خۆشی و تەناهیێ دا بژین، و پاشەڕۆژەکا گەشتر و رونتر بۆ گەلێ کوردستانێ بێتە ئاڤاکرن .

 

(*)

چالاکڤان