دوو یاریزانی كورد بەشداری پاڵەوانێتی موای تای وڵاتانی عەرەبی دەكەن
هەڵبژاردەی نیشتمانی موای تای عێراقی بڕیارە لە ڕۆژی 10/8/2026 لە وڵاتی لیبیا بەشداری پاڵەوانێتی موای تای وڵاتانی عەرەبی بكات. ئەم پاڵەوانێتیە بەبەشداری ژمارەیەك لە كوڕ و كچانی هەڵبژاردەی وڵاتانی عەرەبی بەرێوەبچێت، هەڵبژاردەی عێراقی ئامادەكاری تەواوی كردوە بۆ ئەوەی بتوانێ‌ ئەنجامێكی دڵخۆشكەر بەدەست بهێنێت، لەم ناوەندەشدا كچ و كوڕە یاریزانێكی كوردی پارێزگای سلێمانی بەشداری ئەم پاڵەوانیتیە گەورەیە دەكەن و ئامادەكاری پێویستیان كردوە بۆ ئەوەی بە ناوی عێراق وەكو یاریزانی كورد بتوانن ئاست و ئەنجامیان بەدڵی هەوادارانیان بێت. كچە یاریزانی یانەی پێشمەرگەی سلێمانی(بیرتان دانا) و كوڕە یاریزانی یانەی پێنجوێن (ئاژوان ئارام) یاوەری هەڵبژاردەی نیشتمانی عێراق دەكەن لەم پاڵەوانێتیە كە بڕیارە لە (10/8/2026) لە شاری بەنغازی لە وڵاتی لیبیا یارییەكانی بەرێوەبچێت و بۆماوەی پێنج ڕۆژ یارییەكانی بەردەوام بێت. لە ئێستا یاریزانانی هەڵبژاردەی عێراق لە شاری بەغداد لە كەمپێكی چڕی ئامادەكاری بەشدارن و چاویان لەوەیە زۆرترین مەدالیای جۆراوجۆر بەدەست بهێنن و بتوانن ناوی خۆیان و كوردستان و عێراقیش بەرز بكەنەوە، یاری موای تای لە شاری سلێمانی گرینگی زۆری پێ دەدرێت و شارەكە خاوەنی چەندین كچ و كوڕە یاریزانی بە توانا و بە ئەزموونە بۆ ئەوەی داهاتوویەكی باشتریان هەبێت لەم یارییە.