ڕێکخراوە دەریاییە نێودەوڵەتییەکان ڕۆژی هەینی ٨ی ئایاری 2026، هۆشدارییان دا سەبارەت بە دۆخی دەروونی هەزاران دەریاوان کە لە سەرەتای دەستپێکردنی ململانێکانی ئەمریکا و ئیسرائیل لەگەڵ ئێران لە ناوچەی کەنداوی فارس گیریان خواردووە.

بەگوێرەی ئاژانسی فرانس پرێس، ئەو ڕێکخراوانە ڕایانگەیاندووە، کە لە ماوەی چەند هەفتەی ڕابردوودا زۆرێک لە دەریاوانان تووشی هێرشی فڕۆکەی بێفڕۆکەوان و مووشەکی، هێرشی کەشتی و تەقەی دەریایی بوون و ئێستا ڕووبەڕووی کێشەی وەک دڵەڕاوکێی توند، ماندوێتی دەروونی، خەمۆکی و ترسی بەردەوام بوونەتەوە.

هەروەها ڕێکخراوی دەریایی نێودەوڵەتی ڕایگەیاندووە، کە لە سەرەتای قەیرانی ئەم دواییە لانیکەم ١١ دەریاوان گیانیان لەدەستداوە و دوو کەشتی بازرگانیش لە لایەن هێزەکانی ئێرانەوە دەستی بەسەردا گیراوە.

بەگوێرەی ڕاپۆرتەکە، دوای پەرەسەندنی گرژییەکان و گەمارۆدانی گەرووی هورمز، نزیکەی 20 هەزار دەریاوان لە ناوچەکەدا گیریان خواردووە و بەردەوامی نائەمنی دەریایی نیگەرانییەکانی لەبارەی تەندروستی دەروونی و سەلامەتییان زیاتر بووە.

 

 

 

گوڵان: سەردار خەلیل