پرسی کورد لە دەڤەرێکی جیوپۆلوتیکی دا وەک ناوچەی ڕوژهەڵاتی ناوەڕاست ڕووبەڕووی ئەقڵیەتێکی سیاسی شوفینی بوتەوە، ئەقڵیەتێک کە دژی ئامانجە نەتەوەیی و نیشتیمانیەکانیەتی، دەوڵەتە داگیرکارەکانی هەر چواربەشەکەی کوردستان وەک تورکیا، ئێران، عیڕاق و سوریا بە هاوبەشی دژی دۆزی ڕەوای نەتەوەیی کوردن و هەموو ئامرازێکی مادی، مەعنەویان گرتوتە بەر و دەگرنە بەر بۆ هەر هەنگاوێک کە دۆزی کورد بە ئاراستەی کیانێکی سیاسی سەربەخۆ ببات و بەرژەوەندی داگیرکاران خۆی لە ڕێگریکردن لە هەر گوتارێکی سیاسی یەکگرتووی کورددا دەبینێتەوە.

شایانی گوتنە دەوڵەتە زلهێزەکانیش بە شایەتی مێژوو کوردیان وەک ئامرازێکی سیاسی بەکار هێناوە لەپێناو بەرژەوەندی خۆیاندا نەک وەکو هاوپەیمانێکی ڕاستەقینە، چونکە گشت هاوپەیمانەکانیشیان لە ئەنجامدا بە خیانەت و فروشتنی کورد کۆتایی هاتووە بە تایبەت لەو کاتەی کە پێویستیان بە کورد نەمابێت.

بەڵام گەر بێت و ئێمە تەنها لەسەر ئاستی دەرەکی هۆکارەکان شی بکەینەوە و بیانخوێنینەوە خوێندنەوەکەمان و شیکردنەوەکانمان تەواو دەرناچن، چونکە بێجگە لە هەڕەشەو مەترسی دەرەوە مەترسی ڕیشەیی سەرەکی ناوەوەشەوە دێت بە جورێک کە کورد بە درێژایی مێژووی سیاسی ناوچەکە نەیتوانیوە گوتارێکی سیاسی یەکگرتوو و بەردەوام بۆ پرسی خۆی بونیات بنێت.

جیاوازی ئایدولۆژی حزبە سیاسیەکانی کوردستان لە ناسیۆنالیزمی کلاسیکیەوە تا چەپی ڕادیکال، لە فیدڕاڵیزمەوە تا سەربەخۆیی تەواو کراونەتە ئامراز لە لایەن دەوڵەتە داگیرکارەکانی کوردستانەوە بە ئامانجی شکاندنی یەکڕیزی و تەبایی کورد؛

هەروەها تایبەتمەندی جوگرافی چوار پارچەی کوردستان و جیاوازی بارودۆخی سیاسی و ئابوری و کەلتووری هەر پارچەیەک بووەتە هۆی ئەوەی کە بەهێزتربن لە یەکڕیزی نیشتیمانی ئەمەش لە ڕاستیدا کێشەیەکی ساختاریە کاتێک نەتەوەیەک لە نێوان چوار دەوڵەتدا دابەش دەکرێت وهەربەشێک لە چەمکی سیاسی و ئێکونومی وکەلتووری جیاوازدا ژیان دەکات ئەوا دروستکردنی گوتارێکی یەکگرتوو نەک بە تەنیا زەحمەت دەبێت بەڵکو ئەستەمیشە.

باشوری کوردستان شێوازی دیموکراسیەکی فیدڕاڵی پیادە دەکات، باکوری کوردستان لەنێو کێشەی چەکداریدا بەردەوامە، ڕوژئاوای کوردستان تاقیکردنەوەیەکی سیاسی نوێ پەیڕەو دەکات و کوردی ڕوژهەڵاتیش لەژێر چەوسانەوەی سیستماتیکی دەزگای تیۆکراسیدا دەژیت.

ئەم چوار ئەزمونەی کە ئاماژەمان پێدان هەرچەند لە ناوخۆی کوردستانی چوار پارچەدان بەڵام لە ڕووی سیاسی، ئابوری، کەلتووریەوە لە یەکدی جیاوازن و جیاوازیەکەش زیاترە لە جیاوازی زورێک لە گەلانی ناوچەکە؛

لێرەدا پرسیارێک دێتە پێشەوە، کورد لە قوناغی ئێستادا بەرەو کام ئاراستەیەک هەنگاو دەنێت؟
شڕوڤەکان سێ پێشنیار پێشکەش دەکەن:

یەکەمیان/ ئەوەیە کە هەربەشێکی کوردستان لەنێو چوارچێوەی دەوڵەتی داگیرکەردا هەوڵی بەرەو پێشڤەچوون بدات ئەمەش لە ڕاستیدا بریتی دەبێت لە پەسەند کردنی واقیعێک کە گۆڕانی نیە.

دووەمیان/ پشتبەستن بە زلهێزێکی دەرەکی کە بەرژەوەندی کاتی هەیە لە پشتگیری کردنی کورد بەڵام مێژوو ئەوەی ئاشکرا کردووە کە ئەمەیان زیانی زیاترە لە سوود.

سێیەمیان/ کە سەخترینە بەڵام لە هەمان کاتدا ئەمەیان گرنگترینیانە ئەویش ئەوەیە کە بەرەو گوتارێکی نیشتیمانی هاوبەش هەنگاو بنرێت، گوتارێک کە بونیاتنرابێت لەسەر یەکسانی سیاسی و کەلتووری بەردەوام بێت نەک تەنیا لەسەر یەکسانی جوگرافی.

کورد وەک باڵندەیەک کە هێلانەی نیە-فرینی هەیە،
بەرژەوەندی هەیە بەڵام ئاسودەیی نیە، بەبێ دەوڵەتی خۆی هەر چەند شوڕش بکات و قوڕبانی بدات ئاسودەیی ڕاستەقینەی نابێت، چونکە ئاسودەیی کورد تەنیا لە هێلانەی خۆیدا دەبێت.