ئەڤ چیروکا تەنزئامێز یا نڤیسەرێ ناڤدار عەزیز نەسینی، ئێکە ژ کویرترین ئەو دەقێن هاتینە نڤیسین د ڕەخنەگرتنێ دا ل سەر پویچیێ و ڕاستی یا جڤاکی و سیاسی؛

ب شێوەیەکی وێ وێنە دکەت کا مرۆڤ چەوا دکەڤنە د ناڤ هەڤڕکی و سازشێن شەرمزارکەر دا، داکو ل دوماهیێ هەر بزڤڕنە هەمان خالا دەسپێکێ، بەلێ ب تێچوویەکێ مەزنتر، کو ئەو ژی ژ دەستدانا کەرامەتا وانە.
چیرۆکا حەمدی و ئاغای
جۆتیارەک هەبوو بناڤێ "حەمدی"، ب پیان ژ گوندێ خۆ بەرەڤ باژێری دچوو دا تۆڤی بینیت. د ڕێکێ دا کوڕێ ئاغایێ گوندی دیت کو ل سەر تراکتۆرێ بوو. ئاغای گۆتێ: "وەرە سوار ببە حەمدی". د ڕێکێ دا، کوڕێ ئاغای یاریەکا پیس ب سەرێ حەمدی ئینا و گۆتێ: "حەمدی، ئەگەر تو ڤێ ریخا چێلێ بخۆی، ئەڤ تراکتۆرە دێ بیتە مالێ تە!". حەمدی ژ پێخەمەت ب دەستخۆڤەئینانا تراکتۆرێ، پیساتی خوار و ئاغای ژی ب دلەکێ گران تراکتۆر دا حەمدی.
دەمێ ڤەگەریاین، حەمدی ژ بەر تاما وێ پیساتیێ یێ بێزار بوو، و ئاغا ژی یێ دلگران بوو بۆ ژ دەستدانا تراکتۆرا خۆ. حەمدی پیساتیەکا دی دیت و گۆتە ئاغای: "ئاغا، ئەگەر تو ڤێ بخۆی، دێ تراکتۆرێ بۆ تە ڤەگەرینم". ئاغای ژی ژ بەر تراکتۆرا خۆ ڕابوو و پیساتی خوار و تراکتۆر وەرگرتەڤە. نێزیکی گوندی بوون، حەمدی گۆت: "ئاغا، ئەز حەمدی چووم و وەک حەمدی ڤەگەڕیام، تو ژی ب تراکتۆرێ چووی و ب تراکتۆرێ ڤەگەڕیای.. پا ما مە بۆچی ئەو پیساتی خوار؟!"

هەڤبەرکرنا ململانێ یا ئەمریکا-ئیسرائیل و ئیرانێ ب چیرۆکا "حەمدی و ئاغای" دچیت،
د ململانێ یا ناڤبەرا ئەمریکا و ئیسرائیلێ ژ لایەکی، و ئیرانێ ژ لایێ دی ڤە، هەمی ل بازنەکێ تژی ژ توندکرنێ دزڤڕن، سزا یێن ئابۆری، گەف، نیشاندانا هێزێ، و شەڕێن ب بریکاری. هەر لایەنەک هندەک "سازشێن ب ئێش" دکەت یان پێنگاڤێن گران ژ لایێ سیاسی، ئابۆری و ئەخلاقی ڤە دهاڤێژیت، ب وێ هزرێ، کو دێ دەستکەفتەکێ ئێکجارەکی و ئێکلاکەر بدەستخۆڤە ئینیت.
بەلێ ئەنجام هەتا نوکە دورست وەکی دوماهی یا چیرۆکێ یە، چ شەڕێن گشتگیر نەبوونە ئەگەرێ ئێکلاکرنا ململانێیێ، چ ئاشتیەکا ڕاستەقینە نەهاتی یە ب دەسئێخستن، و هەمی لایەن د جهێن خۆ یێن سەرەکی دا ماینە.
و ئەو پرسیارا کو وەکی پرسیارا حەمدی یە، ئەگەر هەمی لایەن ڤەگەڕیابنە سەر هەمان خال، پا ئەڤ هەمی مەزاختن و هێز ژ ناڤبرنە بۆ چ بوو؟
درست وەکی چەوا "هەردوو لایەنان بێ مفا ریخا چێلێ خواری"، بەردەوامبوونا ڤێ توندکرنێ بێی هەبوونا ئاسۆیەکی بۆ چارەسەریێ، رامانا وێ دۆراندنەکا ب کۆمە (ژ لایێ ئابۆری، مرۆڤایەتی و سەقامگیریێ ڤە) بێی کو چ گوهۆڕینێن ریشەیی د تەرازی یا هێزێ دا پەیدا ببن.

دەرئەنجام و پەندا ڤێ چيرۆکێ ئەوە، کو گەلەك کەرامەت و بەها دبنە قوربانی بەرژەوەندی یێن کێم، و مرۆڤ دکەڤنە د ناڤ شەڕ و دەستبەرداربوون و خۆ چەماندنێن رەوشتی دا، و ل دوماهيێ چو گۆهۆڕین د بارودۆخێ وان دا پەیدا نابن، بتنێ تشتێ ژ دەست ددەن مروڤایەتی یا وانە.