هەرێما کوردستانێ د قۆناغەکا زۆر هەستیار دا دەرباز دبیت تێدا پێشهاتێن سیاسی یێن ناڤخۆیی و عێراقی پێکڤە گرێداینە ئێک ژ دیارترین وان پێشهاتان پرۆسەیا هەلبژارتنا سەرۆک کۆمارێ عێراقێ بوو کو تێدا پارتی دیموکراتی کوردستان هەڵوێستەکێ روون و ئاشکرا وەرگرت ب نەدەنگدانا پارتی بۆ بەربژێرێ سەرۆک کۆماری پەیامەکا سیاسی یا ب هێز گەهاند کو پۆستێن سیادی یێن کوردان ل بەغدا نابیته‌ پشک و پۆستێن حزبی بەلکو دڤێت نوونەراتیا ئیرادا گەلێ کوردستانێ و پاراستنا مافێن وێ یێن دەستووری بکەن .

هەروەها ئەڤ هەڵوێستە سەلماند کو پارتی ل سەر پرەنسیپێن نیشتمانی سازشێ ناکەت و نابیته‌ پشکەک ژ رێککەفتنێن ل سەر حیسابا بەرژەوەندیێن بلند یێن هەرێمێ
ئەڤە ژ لایەکێ ڤە و ژلایەکێ دی ڤە دۆسیەیا کەرکووکێ و رادەستکرنا پۆستێ پارێزگاری ب لایەنێن دی یێن دەرڤەی ئیرادا خەلکێ کەرکووکێ برینەکا دی یا سیاسی بوو کو کەرکووک وەک دلێ کوردستانێ و ناسنامەیا نیشتمانی دهێتە دیتن هەروەها دڤیا د ناڤا رێککەفتنەکا نیشتمانی و ل سەر بنەمایێ ئەنجامێن هەلبژارتنان بهێتە رێڤەبرن رادەستکرنا ڤی پۆستی ب شێوەیەکێ کو د بەرژەوەندیا پێکهاتەیا کوردستانی دا نەبیت ئاماژەیەکا مەترسیدارە بۆ پاشەرۆژا دەڤەرێن کوردستانی یێن دەرڤەی ئیدارەیا هەرێمێ ئەڤ پێشهاتە دکەڤیتە خانەیا لاوازکرنا پێگەیێ کوردان ل دەڤەرێن جێناکۆک کو دڤێت هەمی لایەن ب بەرپرسیارەتیەکا مێژوویی ڤە لێ بنێرن
هەروەها ئەڤ دو پێشهاتە هەڵوێستێ نیشتمانی ل بەغدا و ئالۆزیێن ئیداریا کەرکووکێ نیشان ددەن کو هەرێما کوردستانێ د ناڤا ململانێیەکا دژوار دایە بۆ پاراستنا قەوارەیێ خۆ یێ یاسایی د ڤێ قۆناغێ دا، زێدەتر ژ هەر دەمەکێ و پێدڤی ب هەماهەنگیەکا زێدەتر یا راستەقینە هەیە دناڤبەرا هێزێن سیاسی دا . دا کو ەستکەفتێن گەلێ مە نەبنە قوربانیێ بەرژەوەندیێن کێم و کورتخایەن ئەرکێ نیشتمانی یێ هەر لایەنەکی ئەوە کو کەرکووکێ و پۆستێن سیادی یێن هەرێمێ ل بەغدا وەک هێلا سۆر ببینن و رێگریێ ل هەر هەولەکێ بکەن کو ببیتە ئەگەرێ لاوازکرنا ناسنامەیا کوردستانیا ل باژێرێ کەرکووکێ و ناوچەیێن جێناکۆک
ب نێرینا من سەرکەفتنا هەرێمێ د ڤان ئالنگاریان دا بتنێ ب رێکا ئێک دەنگی و پێداگریێ یە ل سەر مافێن دەستووری و یاسایی و سیاسی و ئابووری .
هەروەها پاشەرۆژا گەلێ مە و پاشەرۆژا کەرکووکێ و پێگەیێ بهێز یێ هەرێمێ ل بەغدا رەنگ ڤەدەت و ئەڤە ژی پێتڤی ب بڕیارێن بوێر و نیشتمانی یە وەک ئەوا پارتی د هەلبژارتنا سەرۆک کۆماری دا نیشان دای.