پ.د. نەزاكەت حسێن، ئەندامی بازنەی گفتوگۆ و ئەندامی بەشی ڕۆشنبیری و ڕاگەیاندنی پارتی دیموكراتی كوردستانە و سەرنووسەری ڕۆژنامەی «كوردیش گلۆپ» چاپی ئینگلیزییە. لە گفتوگۆی ئەم جارەی «بازنەی گفتوگۆ»دا (یەكبوونی كورد لە گۆڕانكارییەكانی ڕۆژهەڵاتی ناوەڕاستدا)، بەم جۆرە دیدوتێڕوانینی خۆی خستەڕوو.

پرسی یەكبوونی كورد لە ئێستادا لە باشترین حاڵەتدایە، دوای ڕووداوەكانی ڕۆژئاوا و ئەوەش كە لە ئێستادا لە ڕووداوەكانی جەنگی نێوان ئیسرائیل و ئێران، یەكبوونی كوردی بردە قۆناغێكی نوێ و ئاست بەرزەوە، ئەوەی لەمەو دوا باسی بكەین، بریتییە لەوەی چۆن ئەم یەكبوونە وەبەرهێنانی تێدا بكرێت و بەرەو ئامانجە گەورەكە ببڕێت. هەموو ڕووداوێك ڕەنگە مەترسی بێنێتە ئاراوە، بەڵام لە هەمان كاتدا دەرفەتیش دێنێتە ئاراوە، ڕووداوەكانی ئەم چەند ساڵەی ڕابردوو و ئێستای ڕۆژهەڵاتی ناوەڕاست مەترسیی بۆ هەندێك وڵات و لایەن دروست كرد، بەڵام دەرفەتیشی بە زۆر لا دا. بە بڕوای من ڕەنگە ئاسان نەبێت هەموو كات وڵات، یان مرۆڤ خۆی لە هەموو مەترسییەكان بپارێزێت، چونكە بە جۆرێك لە جۆرەكان ڕەنگە پریشكی بەر بكەوێت، بەڵام ئاسانە سوود لە دەرفەتەكان وەربگرین، وەك كورد ڕەنگە زۆر دەرفەتمان لەدەست دابێت بە هۆكاری خودی بێت، یان دەرەكی، لە هەمان كاتدا زۆر دەرفەتیشمان قۆستوەتەوە، چونكە خاوەنی سەركردەی وریا و زیرەك و بەئەزموونین، بەتایبەتی سەركردەیەكی وەك سەرۆك بارزانی كە بڕیاری ڕیفراندۆم بدات و لە ڕابردووشدا لە چەندین قەیراندا كوردی ڕزگار كردووە و، زۆرێك لە دەرفەتەكانی قۆستوەتەوە بۆ كورد. ئەوەی لە ئێستادا گرنگە ئەوەیە كە كورد وەك جاران نییە كە تەنیا بە جەنگاوەرێكی باش باس بكرێت، ئێستا ئەزموونی ٣٠ ساڵی ڕابردووی هەرێمی كوردستانی هەیە كە توانی نەك تەنیا لە قەیرانە یەك لەدوای یەكەكاندا خۆی دەرباز بكات، لە جەنگی دژی تیرۆريستان و داعشیشدا ڕۆڵێكی یەكلاكەرەوەی گێڕا، ئێستا هەرێمی كوردستان بووەتە ناوەندێك بۆ خەمی كوردانی پارچەكانی دیكەی كوردستان و بگرە وڵاتانی دەوروبەریش. لە هەمان كاتدا بەشداریپێكردنی كورد لە كۆنفڕانسە جیهانییەكانی تایبەت بە وزە و ئابووری و كێشە جیهانییەكان، ئەوەی سەلماندووە كە كورد ئێستا دیپلۆماتكاریكی باشە و دەتوانێت لە چارەسەری كێشەكانی جیهان ڕۆڵی هەبێت و لەسەر یەك مێز لەگەڵ سەركردەكانی وڵاتانی جیهان پرسە هاوبەشە جیهانییەكان باس بكات و ڕێگەچارەیان بۆ بدۆزێتەوە. واتە ئەوەی هەیە كورد ئیتر پێویستی بە ناساندنی خۆی و مێژوەكەی و دەرخستنی ناسنامەی نییە، كۆباسەكە ئەوەیە چۆن بەشدارێكی ڕاستەقینەی كاریگەر بێت لە هاوكێشەكانی تایبەت بە ناوچەكانی دەوروبەریدا، جیهانیش ئەوە دەزانێت كە كورد میللەتێكە حەزی بە ئاشتی و ئارامی هەیە، نەك لە شەڕ و ململانێ، بۆیە ڕۆڵی لە ململانێكاندا تەنیا خەمی پچڕانی پشكی خۆی نییە، هێندەی خەمی هاوسەنگی و سەقامگیری و مافی میللەتەكانی دیكەشی هەیە. لەم ململانێ و گرژیانەشدا كورد دەیەوێت، ڕۆڵی ئاشتیخوازانە و هاوسەنگ بگێڕێت، لە هەمان كاتیشدا بەشدار بێت لەوەی چ ڕێگەیەك باشە بگیرێتەبەر، تاكو ڕێگیر بین لە ئاڵۆزبوونی گرژییەكان، دەبێت لە خەمی ئەوەشدا بین كورد پێگەیەكی باش و ئایندەیەكی باشتر و چارەنووسساز بۆ خۆی دیاری بكات. هەرچەندە بارودۆخەكە هەستیارە و مامەڵەی وریایانەی دەوێت و دەبێت دەرفەتەكان دیراسە بكرێن و باشترین و گونجاوترین دەرفەت لەدەست نەدرێت.

ئەزموونی هەرێمی كوردستان، ئەگەرچی بەهۆی ئەو هەموو قەیرانەی بۆی دروست كرا، بێ كەموكووڕی نەبووە، بەڵام سەلماندی كە دەتوانێت ببێتە ناوەندێكی وەبەرهینانی جیهانی و بەرهەمهێنانی بەروبوومە ناوخۆییەكان و بەشدار لە بازاڕی وزە و كوشتوكاڵی و بونیادنانی كۆمەڵێك پڕۆژەی ستراتیژی و بەنداو و بەهێزكردنی ژێرخانی وڵات، هەروەها بەدیجیتاڵكردنی بەشێكی زۆری خزمەتگوزارییەكان بۆ كارئاسانیی هاووڵاتیان و گەشەسەندن لەگەڵ پێشكەوتنەكانی سەردەم. جگە لەوەی لە ڕووی گەشتیارییەوە بەردەوام بەرەو ئاستێكی باش دەڕوات و توانای لەخۆگرتنی گەشتیاری ناوخۆیی و بیانی هەیە، كە ئەمانە هەمووی سەرمایەن و بەردی بناغەی دەوڵەتێكی پێشكەوتوون. واتە كورد لە باشووری كوردستان سەلماندوویەتی كە ئەگەر دەرفەتی هەبێت، پارچەكانی دیكەشی سەربەخۆییان هەبێت، دەتوانێت باش خۆی بەڕێوەبەرێت و لە ئاست گەشەسەندنەكاندا بێت.