پێکەوەژیان لە ڕووی زمانەوانییەوە لە دوو وشە پێک دێت، یەکەمیان پێکەوەیی کە واتای بە یەکەوە بوون دەگەیەنێت لە هەمان شوێن و هەمان کاتدا، وشەی دووەم ژیانە کە مانای درێژەدان و بەردەوامییە، بۆیە چوارچێوە و سەقفی هەموو خێزانێک ڕێزگرتنە لەو دوو وشەیە و تێگەشتنە لە مانا و ناوەڕۆکەکەی،
ئافرەت و پیاو لە ژیاندا چەندین ڕایەڵەی پەیوەندییان هه یە ، بۆ نموونە کاتێک باس لە پەیوەندی نێوان ئافرەت و پیاوان دەکرێت بە پلەی یەکەم وەکو پەیوەندی خێزانی و هاوسه رگیری و خۆشەویستی تێدەگەین ،
پەیوەندییەکانی پێکەوە ژیان دەبێت لە ئاسۆیەکی فراوان و فرەلایەنەی پەیوەندییە ئابووری و ڕامیاری و کۆمەڵایەتی و کلتوورییەکانی نێوان ئافرەت و پیاودا مامەڵەی لەگەڵدا بکرێت، بێگومان پێکەوژیانی ئازاد دەرئەنجامی پەیوەندییەکە لەسەر بنەمای یەکسانی و ڕێزگرتن ،ئازادی و بنیاتنانی ژیانی کۆمەڵایەتی پێکەوەیی لە نێوان ئافرەت و پیاودا، بۆ بونیادنانی ژیانێکی لەوجۆرە پێویستە بزانین کە یەکسانی و پەیوەندیی ئازادیحوازی نێوانیان چییه،

پێکەوەژیان لەسەر چەند بنەمایەکی سەرەکی دادەمەزرێت، یەکەمیان چەسپاندنی بیروباوەڕی یەکتر قبووڵکردنە کە زیاتر پەیوەندی بە پێگەیاندنی تاک هەیە لە کۆمەڵگادا، دەبێت وەک کلتوورێک لە ناخ و هەستی تاکەکانی کۆمەڵگە دروست بکرێت، دووەمیان دروستکردنی پێکهێنانی بەرژەوەندی هاوبەش لە ژیانی ڕۆژانەدا کە تاکەکان بە یەکەوە دەبەستێتەوە، سێیەمیان هەبوونی ڕێسا و یاسای گشتیی لە کۆمەڵگادا کە دەبێتە سەرچاوەی دامەزراندنی ژیانی پێکەوەیی و چاودێری وردی ژیانی ڕۆژانەی هاووڵاتییان بۆیە پێویستە سەرەتا لە خێزانەوە تا دەگات بە پەروەردە و؟سیاسەت کە ژن پیاو پێکەوە کاردەکەن و پێکەوە مشتومڕ دەکەن دەبنە گۆڕەپانی پێکەوەژیان، کە لە هەمان کاتدا پێویستە پێکەوەژیانی ئازاد لەو بوارانەدا پێک بێت.
بێگومان لەم جۆرە ژیانەدا ئافرەت و پیاو مافی خۆیانە کە بڕیار لەسەر ژیانیان بدەن، ئافرەت دەتوانێت خۆی بڕیاردەری ژیانی خۆی بێت و پیاویش ڕێز لە ڕاوبۆچوونی بگرێت و بڕیارەکانی یەکتری قبوڵ بکەن .
بێگومان کاتێک لەسەر بابەتێک لە یەکتری تێناگەن دەبێت هەوڵ بدەن بەتێگەیشتن چارەسەری ئەو گرفتە بکەن، لەکاتی پێویستدا پێشنیار و ڕا جیاوازەکانی یەکتر قبوڵ دەکەن و نابێت خۆیان بەسەر یەکتریدا بسەپێنن و گرنکە ئەم تێگەیشتنە لە نێوان خێزان و،خانەوادەدا هه بێت ،ئەم جۆرە لە یەکتر تێگەیشتنە لە خێزانەوە دەست پێدەکات و شۆڕ ده بێتەوە بۆ هەموو بوارە کانی ژیانی کۆمەڵایەتی .
پێکەوەژیانی ئازاد دەتوانێت چارەسەر بێت بۆ زۆرێک لە کێشە و گرفتەکان کە لە نێوان ئافرەت و پیاودا ڕوودەدەن .