ئەم چوار ساڵەی داهاتوو بۆ کورد و کوردستان لە عێراقدا ئاسان نابێت, گۆڕانکارییە سیاسییەکان و بەهێزبوونی شۆڤێنیزمی سیاسی لە ناو نەوەی دووەمی نوخبەی حوکمڕانی عێراق و پێكهێنانی زۆرینەی پەرلەمانی عێراق، هەموویان نیشانەی قۆناغێکی مەترسیدارن کە دەبێت بە وردی لێی بڕوانرێت.

لەم دۆخەدا، پاراستنی قەوارەی دەستووری هەرێمی کوردستان و مافە بنچینەییەکانی گەلی کورد، پێویستی بە هەڵوێستێکی یەکگرتوو، ڕوون و بەرپرسیارانە هەیە. یەکدەنگی لایەنە سیاسییە کوردییەکان لە پەرلەمانی عێراق، هەڵبژاردە نییە؛ پێویستییەکی نیشتمانی و مێژووییە, پەرتەوازیی سیاسی و ناکۆکیی ناوخۆیی، تەنها زیانی گشتی بۆ کورد و کوردستان لێ دەکەوێتەوە.

له‌م قۆناغه‌ پێویستە شارەزاترین کەسایەتییە سیاسییە نیشتمانیه‌كان بنێردرێن بۆ بەغدا, بۆ نوێنەرایەتیكردنی کوردو كوردستان به‌گشتی, بەغدا شوێنی ململانێی ناوخۆیی نییە، بەڵکو شوێنی بڕیارسازیی گرنگە کە کاریگەریی ڕاستەوخۆی لەسەر داهاتووی هەرێمی کوردستان هەیە.

وەک چاودێرێک دەبێت بە ڕوونی بڵێم: سیاسەت لەسەر قەزا و قەدەر نابێت, ئەگەر دۆخی پەرتەوازبوون و ناکۆکیی سیاسی بەردەوام بێت، ئەوا مەترسییەکان تەنها لە سنووری سیاسی ناوەستێن، بەڵکو دۆخی ئابووری، کۆمەڵایەتی و ژیانی ڕۆژانەی خەڵکیش بەرەو خراپی دەچێت, لەم بارودۆخەدا دژەکورده‌كان دەتوانن ئاسانتر پیلان و بڕیاره‌كانیان جێبەجێ بكه‌ن.

بەڵێ، کوردستان لە رابردوودا قەیرانی زۆر قورس و سەختی تێپەڕاندووە، بەڵام ئەو ئەزموونانە دەبێت وەک وانە و ئاگاداری بەکاربهێنرێن، نە وەک هۆکارێک بۆ ئارامگرتن و پشتگوێخستنی مەترسییەکان.
ئەم وتارە بۆ ترساندن نییە، بەڵکو بۆ ئەوەیه‌ دووبارە تووشی قەیرانێکی سەختتر نەبینەوە.

ئێستا کاتی بڕیارە:
یان یەکدەنگی، هەڵوێستی نیشتمانی و پاراستنی مافەکانمان.
یان بەردەوامی پەرتەوازی و چوونە ناو قۆناغێکی تاریکتر.

مێژوو ئەم پرسیارەمان لێ دەکات و وەڵامەکەی تەنها بە کردار دەدرێت، نەك بە قسە.