لە هەولێر یادی 130 ساڵەی رۆژی جیهانی سینەما كرایەوە
لە 130 ساڵەی ڕۆژی جیهانی سینەمادا،ئەزموون و هەوڵ و کۆششی ئەكتەر و دەرهێنەری کۆچکردوو(زوهێر عەبدولمەسیح) بەرز ڕاگیرا.
ئەمڕۆ یەکشەممە رێکەوتی 28/12/2025 بەئامادەبوونی (ئانۆ جەوهەر) وەزیری گواستنەوە و گەیاندنی حکوومەتی هەرێمی کوردستان و (ئومێد خۆشناو) پارێزگاری هەولێر و سیروان حەسکۆ بەڕێوەبەری نوسینگەی مەلامستەفا بارزانی و فەرهەنگ غەفور, بەڕێوەبەرى گشتی ڕۆشنبیرى و هونەرى هەولێر و ژمارەیەکی بەرچاو لە هونەرمەندو سینەماکاران, لە هۆڵی ئیمپایەر سینەما 130 ساڵەی رۆژی جیهانی سینەما بەرز ڕاگیرا.
ئەم بۆنەیە لەلایەن بەڕێوەبەرایەتی سینەمای هەولێر بە هەماهەنگی لەگەڵ بەڕێوەبەرایەتی گشتی رۆشنبیری و هونەری هەولێر و پاڵپشتی پارێزگای هەولێر بەڕێوەچوو,لە سەرەتای ئەم ڕێورەسمەدا بە رێزگرتن لە مێژووی هونەری و ئافراندن و کارەکانی پێشمەرگەو هونەرمەندی کۆچکردوو (زوهێر عەبدولمەسیح) دەستی پێکرد وەكو یاد و وەفایەك بۆ خزمەتی چەندین ساڵەی بە هونەری سینەمای كوردی,هەروەها فیلمی سینەمایی(سێ گۆشەی مەرگ) نمایشکرا کە پێشمەرگە و دەرهێنەری کۆچکردوو (زوهێر عەبدولمەسیح) خۆی کارەکتەرو پاڵەوانی نێو فیلمەكەیە.
هەر لەم بۆنەیەدا دیاریی ڕێزلێنان بەخشرایە ستاڤی (پرۆژەی سینەماو جەماوەر)،وێرای چالاکی دیکەی هونەری,کە سەرجەم کارەکان بوونە مایەی سەرنج راکێشانی ئامادەبووان.
گوڵان-ئاسۆ كاكەیی
