كەرتی گەشتیاری لە جیهانی ئەمڕۆدا بە یەكێك لە سەرچاوە هەرە گرنگەكانی داهاتی نیشتمانی و بزوێنەری سەرەكیی ئابووری دادەنرێت، لە هەرێمی كوردستانیشدا بەهۆی بوونی سرووشتێكی دڵڕفێن، كەشوهەوایەكی لەبار و سەقامگیریی ئەمنی، ئەم كەرتە هەنگاوی گەورە و بەرچاوی ناوە. یەكێك لەو گۆڕانكارییە ئەرێنییانەی كە لە ماوەی ڕابردوودا سەرنجی چاودێران و میدیا ناوخۆیی و جیهانییەكانی ڕاكێشاوە، گۆڕانكارییە ئیداری و خزمەتگوزارییەكانی دەڤەری زاخۆیە، كە بووەتە نموونەیەكی زیندوو بۆ چۆنیەتیی گەشەپێدانی شارەكان و ڕاكێشانی گەشتیاران. دوای ئەوەی بڕیاری بە ئیدارەكردنی سەربەخۆ بۆ زاخۆ دەرچوو، وەرچەرخانێكی گەورە لە شێوازی بەڕێوەبردن و جێبەجێكردنی پڕۆژەكاندا ڕوویدا. ئەم هەنگاوە تەنیا گۆڕانكارییەكی ئیداریی ڕووت نەبوو، بەڵكو دەرگایەكی فراوانی بۆ بووژانەوەی ژێرخانی ئابووری و گەشتیاری كردەوە. كاتێك دەسەڵاتەكان شۆڕ دەكرێنەوە و بوودجە و پلانەكان ڕاستەوخۆ لەلایەن ئیدارەی خۆجێییەوە سەرپەرشتی دەكرێن، ئەنجامەكەی خێراتر و بەرهەمدارتر دەبێت، ئەمەش وای كردووە كە زاخۆ لە ماوەیەكی كەمدا ببێتە جێی سەرنجی میدیاكان، نەك تەنیا لەسەر ئاستی ناوخۆ، بەڵكو لەسەر ئاستی دەرەوەشدا وەك ناوچەیەكی گەشتیاری و بازرگانیی گرنگ دەربكەوێت.

پێشكەوتنی كەرتی گەشتیاری ڕاستەوخۆ پەیوەستە بە بووژانەوەی ئابووریی تاكەكەس و خێزانەكانەوە. كاتێك ژێرخانی گەشتیاری بەهێز دەكرێت، لە كردنەوەی پڕۆژەی گەشتیاری، هۆتێل، چێشتخانە و شوێنەكانی كات بەسەربردن، ئەوا هەلی كار بۆ سەدان و بگرە هەزاران گەنج دەڕەخسێت. لەم نموونەیەی باس دەكرێت، دەركەوتووە كە گەشەسەندنی زاخۆ وای كردووە ڕێژەی بێكاری لە ناوچەكەدا ڕوو لە كەمبوونەوە بكات. گەنجانێك كە پێشتر لە بێكاریدا دەژیان، ئێستا دەتوانن لە نێو بازاڕ و پڕۆژە گەشتیارییەكاندا ڕۆڵی كارا ببینن. ئەمەش سەلمێنەری ئەو ڕاستییەیە كە «گەشتیاری نەوتی نەبڕاوەیە» و دەتوانێت ببێتە جێگرەوەیەكی بەهێز بۆ داهاتی نەوت و كەرتی گشتی.

خاڵێكی دیكەی جەوهەری كە لەم پرۆسەی گەشەسەندنەدا بەدی دەكرێت، گۆڕینی هاوكێشەی گەشتیارییە. لە ساڵانی ڕابردوودا بەشێكی زۆر لە گەنجان و خێزانەكانی هەرێمی كوردستان بۆ بەسەربردنی كات و گەشتكردن، ڕوویان لە وڵاتانی دراوسێ، یان ئەورووپا دەكرد، ئەمەش دەبووە هۆی ئەوەی سەرمایەیەكی زۆر بچێتە دەرەوەی وڵات، بەڵام ئەمڕۆ، بە هۆی ئەو پڕۆژە ستراتیژی و جوانكارییانەی كە ئەنجام دراون، هاوكێشەكە پێچەوانە بووەتەوە. ئێستا نەك تەنیا خەڵكی ناوچەكە پێویستیان بەوە نییە بچنە دەرەوە، بەڵكو خۆشبەختانە گەشتیارانی بیانی و خەڵكی وڵاتانی دیكە ڕوو لەم دەڤەرە دەكەن. ئەم هاتنی گەشتیارە بیانییانە، جگە لەوەی داهات دەهێنێتە ناوەوە، ناوبانگی هەرێمی كوردستان وەك ناوچەیەكی ئارام و پێشكەوتوو بە جیهان دەناسێنێت.

هیچ پڕۆژەیەكی گەشتیاری بەبێ بوونی ڕووماڵێكی میدیایی بەهێز سەركەوتوو نابێت. وەك تێبینی دەكرێت ئەو پێشكەوتنانەی لە زاخۆ و ناوچەكانی دیكەی كوردستان ڕوودەدەن، بوونەتە ماددەیەكی بەهێز بۆ میدیای بیانی و ناوخۆیی. كاتێك كەناڵەكان و ڕۆژنامەنووسان باس لە جوانی، پاكوخاوێنی و پێشكەوتنی شارێك دەكەن، ئەوا وێنەیەكی زێڕین لە زیهنی گەشتیاردا دروست دەكەن. میدیا توانیویەتی ئەو پەیامە بگەیەنێت كە كوردستان تەنیا شوێنی شاخ و دیمەنی سرووشتی نییە، بەڵكو خاوەنی خزمەتگوزاریی مۆدێرن و كەلتوورێكی میواندۆستیی بەرزە.

ئەم ئەزموونە گەشەسەندنەی گەشتیاریی لە ناوچەكانی وەك زاخۆ، وانەیەكی گرنگمان فێر دەكات. كاتێك ئیرادەی ئیداری، پلانی ستراتیژی و سەقامگیریی ئەمنی یەك دەگرن، ئەنجامەكەی دەبێتە بووژانەوەیەكی هەمەلایەنە. ئەم گەشەسەندنە تەنیا بریتی نییە لە دروستكردنی باڵەخانە و شەقام، بەڵكو بریتییە لە بنیادنانەوەی متمانەی هاووڵاتی بە خاكەكەی، ڕەخساندنی ژیانێكی شایستە بۆ گەنجان، كردنەوەی دەروازەی كوردستان بە ڕووی جیهاندا. پێویستە ئەم ئەزموونە بكرێتە سەرمەشق بۆ سەرجەم شار و شارۆچكەكانی دیكەی هەرێمی كوردستان، تاوەكو كەرتی گەشتیاری ببێتە كۆڵەكەیەكی سەرەكی و نەبڕاوەی ئابووریی نیشتمان.