لە كانوونی دووەمی ساڵی 2023 وەك بەشی ڕۆشنبیری و ڕاگەیاندنی پارتی دیموكراتی كوردستان، بڕیارمان دا ئۆرگانێكی سەربەخۆ بەناوی «بازنەی گفتوگۆ» دابمەزرێنێن كە وەك سەكۆیەكی كراوە هەموو جیاوازییە ساسی و ئایینی و نەتەوەییەكان پێكەوە كۆبكەینەوە و، هەموومان وەك ئەركێكی نیشتمانی و نەتەوەیی شان بدەینە بەر خەم و كێشە و گرفتەكانی ئەم وڵاتە و، پێكەوە بیر بكەینەوە و میكانیزمی باش و پێشنیاری دروستیان بۆ بخەینە ڕوو، بۆ ئەوەی هاوكاری دامەزراوە شەرعییەكانی هەرێمی كوردستان بین و كێشەكان چارەسەریان بۆ بدۆزرێتەوە.

لە دەستپێكەوە بازنەی گفتوگۆ بەو میتۆدە نەخشە ڕیگەی بۆ كارەكانی داڕشت كە «جیاوازییەكان یەكتری تەواو دەكەن»، بۆیە پێویستە گفتوگۆی ڕاشكاوانە ڕایەڵەی پێكەوە بەستنەوەی خاڵی هاوبەشی هەموو جیاوازییەكانمان بن، لەسەر ئەم ڕاستە ڕێییە لە ماوەی سێ ساڵدا هەموو مانگێك گفتوگۆیەكی ڕاشكاوانەیان لەسەر پرسێكی نەتەوەیی و نیشتمانی و پرۆسەی حوكمڕانی، پرسەكانی تایبەت بە ئاشتی كۆمەڵایەتی و ژیان و خۆشگوزەرانیی خەڵك ئەنجام داوە و، ئەم ڕاپۆرتەی لەم ژمارەی گوڵان لە بەردەستی ئێوەدایە، ئەڵقەی سی و شەشەمینی بازنەی گفتوگۆیە بە ناونیشانی «گەشتوگوزار . پردی پەیوەندیی نێوان كەلتوورە جیاوازەكان» .

لە ماوەی ئەم سێ ساڵەدا گفتوگۆكانی «بازنەی گفتوگۆ» زیاتر لە 400-450 سیاسەتمەدار و ئەكادیمیست و دەستەبژێرانی «حزبە سیاسییەكانی كوردستان و عێراق، تەواوی نەتەوە و ئایینە جیاوازەكانی كوردستان، تەواوی دەستەبژێری كورد لە هەر چوارپارچەی كوردستان و ڕەوەندی كوردی» پێكەوە كۆكردووەتەوە و گفتوگۆ لەسەر پرسە جیاوازەكان كراوە، بۆ هەر گفتوگۆیەكیش ڕاپۆرتێكی مەیدانییان لە تەواوی پارێزگا و ئیدارە سەربەخۆكانی هەرێمی كوردستان ئەنجام داوە، بۆ ئەو پرسانەشی كە پێویستیان بە ڕاپرسی بووە، ڕاپرسییان ئەنجام داوە و بە هەزاران هاووڵاتی بەشداریی لەگەڵ كردوون و پێش هەر گفتوگۆیەك، ئاكامی ڕاپرسییەكە و لێدوانی ناو ڕاپۆرتە مەیدانییەكان لەسەر سكرین بۆ ئامادەبووان نمایش كراوە، بۆ ئەوەی دەنگی هاووڵاتیان و ژینگەی ڕاشكاوانەی گفتوگۆكان پێكەوە گرێ بدرێتەوە.

لەسەر ئاستی پلانی ساڵانەیان، بازنەی گفتوگۆ بەو ئاراستەیە كاری كرد كە گفتوگۆكان لە ساڵێكدا بەسەر دوو وەرزدا دابەش بكات و لە هەر وەرزێكدا پرسێكی نەتەوەیی و نیشتمانی و خواستی خەڵك، سەنتەری پێكەوە گرێدانەوەی ڕەهەندە جیاوازەكانی پرسەكە بن و، لە كۆتایی هەر وەرزێكیشدا هەر شەش گفتوگۆكە كراوە بە كتێبێك بە هەردوو زمانی «كوردی و عەرەبی» و لە ڕێوڕەسمێكی شایستەدا پێشكەش كراون و بەشداربووانی گفتوگۆكانیش ڕێزنامەیان پێشكەش كراوە. هەر بۆیە هەتا ئێستا پێنج كتێبی قەوارە گەورەیان پێشكەشی خوێنەرانی كوردی و عەرەبی كردووە، لەم وەرزەشدا كتێبی شەشەمیان بە هەردوو زمانی «كوردی و عەرەبی» ئامادەیە و لە سەرەتای ساڵی داهاتوودا چاپ دەكرێت و لە ڕێوڕەسمێكی شایشتەدا پێشكەش دەكرێت.

وەرزی شەشەمی بازنەی گفتوگۆ كە بەم ڕاپۆرتەی ئەم ژمارەیەی گۆڤاری گوڵان كۆتایی دێت، هەر لە دەستپێكی وەرزەكەوە بڕیاریان دا، گفتوگۆكان تایبەت بن بە «گفتوگۆ لە ناو ڕەهەندە جیاوازەكانی هێزی نەرم»دا و لە ماوەی شەش مانگی ڕابردوو گفتوگۆ لەسەر ئەم تەوەرانە كراون:

• ئالنگارییەكانی بەردەم زمانی كوردی لە ئێستادا.

• هونەر و ناسنامە: كورد چی بكات باشە؟

• شوێنەوار. كۆدەكانی ناساندنی نەتەوە.

• وەرزش ئامرازێك بۆ خۆناساندنی نەتەوە.

• خوێندنی باڵا و توانا زانستییەكانی نەتەوە.

• گەشتوگوزار. پردی پەیوەندیی نێوان كەلتوورە جیاوازەكان.

ئەم شەش تەوەرە كە هەر یەكەیان ڕەهەندێكی ناسنامەی نیشتمانی و نەتەوەییمان لە خۆیدا بەرجەستە دەكات، هەر یەكەیان بە جۆرێك لە جۆرەكان لە بەردەم هەڕەشەی گەورەدان و چاوی تەماحكاریی داگیركاری كوردستانیان لەسەرە، بۆ ئەوەی زمانی كوردی بشێوینن، ئاوازە ڕەسەنەكانمان و شوێنەوارە دێرینەكانمان بدزن و بەناوی خۆیانەوە تۆماری بكەن، ئاستەنگ بۆ لێهاتوویی زاناكانمان و پاڵەوانە وەرزشییەكانمان دروست دەكەن، بۆ ئەوەی داهێنان و پاڵەوانیەتییەكانیان وەك دەستكەوتی كورد و كوردستان نەناسرێن. هەموو ئەو هەڕەشە و ئالنگارییانەی لەسەر ڕەهەندە جیاوازەكانی ناسنامەی نەتەوەییمان لە ئێستادا هەیە، لە گفتوگۆكاندا زۆر بە ڕاشكاوی هەڵوەستەی لەسەر كراوە و نەخشەڕێگەی چارەسەری پێشكەش كراوە.

بۆ ساڵی داهاتوو بەرنامەی بازنەی گفتوگۆ، جگە لەوەی لەسەر كاری خۆی و ڕێكخستنی گفتوگۆی ڕاشكاوانە مانگانە بەردەوام دەبێت، لە هەمان كاتدا پلانمان بەو جۆرە دەبێت كە هەنگاوی زیاتر بچێتە پێشەوە و، چالاكییەكانی تەنیا بەڕێوەبردنی گفتوگۆ نەبێت، بەڵكو ئاسۆی كرانەوەی ئەم پلاتفۆرمە فروانتر دەبێت و هەوڵەكان بەو ئاراستەیە دەبن كە لەسەر ئاستی سۆشیال میدیا چالاكیی جۆراوجۆر و دیالۆگی ڕاشكاوانە بەردەوام پێشكەشی هاووڵاتیانی كوردستان بكات، بەمەش سەكۆی پلاتفۆرمەكە بە ئاستێك فراوان دەبێت، كە هەموو لایەنەكانی ژیانی ڕۆژانەی خەڵك گفتوگۆی ڕاشكاوانەی لەسەر بكرێت.

دوای سێ ساڵ كاركردنی ماندوویی نەناسانە و بەڕێوەبردنی سی و شەش گفتوگۆ و پێشكەشكردنی شەش كتێبی قەوارە گەورە بە هەردوو زمانی «كوردی و عەرەبی»، دەستخۆشی لە ئەندامانی بازنەی گفتوگۆ دەكەم كە توانییان بەبێ ڕەچاوكردنی «ئایین، نەتەوە، ئایدیۆلۆژیەتی سیاسی» جیاوازییەكان پێكەوە كۆ بكەنەوە و گفتوگۆی ڕاشكاوانە لەسەر كۆی پرسە جیاوازەكان بەڕێوەبەرن و، بۆ هەموو لایەكیان سەلماند كە هۆڵی بەشی ڕۆشنبیری و ڕاگەیاندنی پارتی دیموكراتی كوردستان سەكۆی كۆكردنەوەی جیاوازییەكانە لە ژێر ڕەشماڵی ڕێبازی بارزانیدا ئەوەش بەو مانایەی «جیاوازییەكان یەكتری ناسڕنەوە، بە پێچەوانەوە یەكتری تەواو دەكەن».