ئیكۆناشناڵیزم، یان ناسیۆنالیزمی ژینگەیی، زاراوەیەكی تا ڕاددەیەك نوێیە و هەستی نەتەوەیی و بایەخدان بە ژینگە پێكەوە دەبەستێتەوە و، ئەو بیرۆكەیە بەهێزتر دەكات كە پێی وایە سرووشت و دەرامەتە ژینگەییەكان و پاراستنیان، پایەیەكی بنەڕەتییە لە پێكهاتەی ناسنامە و مێژووی هەر گەل و شوێنێك.

بنەماكانی ئیكۆناشناڵیزم :

یەكەم: ژینگەی خۆماڵی و لە سنووری خۆدا.

دووەم: پەیوەندیی ڕۆحی و گیانی لەنێوان هاووڵاتی و ژینگە.

سێیەم: ژینگە و مرۆڤ بریتین لە یەك یەكەی تەواكاری بێ جوودایی.

چوارەم: هاوسەنگی لە نێوان شانازی بە ژینگەی خۆماڵی و بایەخدان بە ژینگەی جیهان.

پێنجەم: بەهێزكردنی سەرچاوە نێوخۆییەكان و، سنوورداركردنی پشتبەستن بە وزەی دەرەكی.

شەشەم: كەمكردنەوەی خاشاك و زیادكردنی دووبارە بەكارهێنانەوە.

سوودەكانی ئیكۆناشناڵیزم:

یەكەم: ئیكۆناشناڵیزم وەك ئامرازێكی جووڵاو و داینامیكی لە توانایدایە خزمەت بە بەرژەوەندیی ناوخۆیی بكات، لە ڕێگەی پشتگیری و هاندانی هاووڵاتیان لە دەستپێشخەرییە گشتییەكان و ناساندنی پاراستنی ژینگە وەك ئەركێكی نیشتمانی.

دووەم: گونجاندنی ئەزموون و داهێنان و هزرە جیهانییەكان و بڕگە و خاڵەكانی نێو ڕێككەوتننامە نێودەوڵەتییەكانی تایبەت بە ژینگە.

سێیەم: كەمكردنەوەی پشتبەستن بە دەرەوە و كاركردن بە بنەمای جیهانییانە، بیركردنەوە و خۆماڵییانە كاركردن لەپێناو داهێنانی ڕێگەچارەی ژینگەییانەی بەردەوام.

چوارەم: پاراستنی ئابووری و پیشەسازیی نێوخۆیی و كەمكردنەوەی هاوردەكردن و كاركردن لەسەر چەمكی ئابووریی سەوز و خودبژێوی.

پێنجەم: پارێزگاریكردن لە ژینگە و پێكهێنەرەكانی بۆ نەوەی ئێستا و داهاتوو.

شەشەم: ڕەچاوكردنی سەروەریی نیشتمانی لە دۆزینەوە و كاراكردنی چارەسەرەكاندا.

حەوتەم: ڕزگاربوون لە كۆتوبەندی بەشێك لەو ڕێككەوتننامە نێودەوڵەتییانەی بۆ بەرژەوەندیی چەند وڵاتێك كاریان پێ دەكرێت.

ئیكۆناشناڵیزم لە ئەزموونی بەشێك لە وڵاتانی جیهاندا:

زۆرێك لە بزاڤە سیاسییەكانی جیهان لە ئەمڕۆدا لایان وایە كە پاراستنی دەرامەتە سرووشتی و ژینگەییەكانی هەر وڵاتێك، بەشێكی بنەڕەتییە لە ناسنامە و سەروەرییەكەی، هەر ئەمەشە وای كردووە كە زۆرێك لە پێشكەوتنە ژینگەییە لۆكاڵییەكان بێنە ئاراوە وەك نموونەی:

ئەمریكا: شانازییكردنی نیشتمانییانە بە جوانیی سرووشتی نیشتمانەوە، هۆكاری دامەزراندنی پاركە نیشتمانییەكانی ویلایەتە یەكگرتووەكانی ئەمریكا بووە.

ئایسلەندا: دەڕوانێتە بەكارهێنانی فراوانی وزەی بەرهەمهاتوو لە گەرمیی زەمینی، وەك شانازییەكی نیشتمانی بۆ پێشەنگبوون و سەربەخۆبوون لە بواری وزەدا.

هەنگاریا: ئیكۆناشناڵیزم ڕۆڵێكی گرنگی هەبووە لە سیاسەتەكانی «پارتی فیدس» لە وڵاتی هەنگاریا، بۆیە سەرۆك وەزیران «ڤیكتۆر ئۆربان» لە ڕوانگەی ئیكۆناشناڵیزمەوە ئەم كارانەی لای خوارەوەی ئەنجام داوە:

یەكەم: هاندانی خەڵك بۆ ڕوانین لە پاراستنی ژینگە وەك پایەیەكی سەرەكیی سەروەریی نیشتمانی.

دووەم: پابەندكردنی كابینەی حكومەت بە ناسینی پاراستنی ژینگە وەك پابەندییەكی باڵای نیشتمانی.

سێیەم: پەیوەستكردنی چەمكی پاراستنی ژینگە بە ناسنامەی نیشتمانییەوە لە پڕۆگرامەكانی خوێندندا.

چوارەم: كۆنتڕۆڵكردنی كۆمپانیا فرەڕەگەزەكانی نێو هەنگاریا و، پێشخستنی كۆمپانیا لۆكاڵییەكان.

پێنجەم: پشتگیریكردنی بەرهەمی كشتوكاڵیی نێوخۆیی و كەمكردنەوەی هاوردەكردنی خۆراك لە دەرەوە.

شەشەم: سەربەخۆبوون لە بواری وزە و وەبەرهێنان لە سەرچاوەكانی وزەی نوێبوەوەی وەك خۆر و با.

هندستان: هیندستانیش ئیكۆناشناڵیزمی وەك دەستپێشخەرییەك بەكار هێناوە بۆ پاراستنی سرووشت و ژینگە، بۆ هێشتنەوەی پێگەی خۆی لەسەر گۆڕەپانی جیهانیدا لە ڕێگەی:

یەكەم: وەبەرهێنان لە بواری وزەی نوێبووەوە بۆ بەهێزكردنی سەقامگیریی ئابووری.

دووەم: جەختكردنەوە لەسەر دابونەریت و سیستم و ڕەفتاری هۆزەكان وەك چارەسەری خۆماڵییانە بۆ گرفتە ژینگەییەكان.

سێیەم: ڕووكردنە كشتوكاڵكردنی ئۆرگانی و، بەكارهێنانی پەینی سرووشتی و، زیندووكردنەوەی ڕێكارە كۆنەكانی وەك كارێز، بۆ پارێزگاریكردن لە ئاو.

نەرویج: ئیكۆناشناڵیزم پێگەیەكی تایبەتی هەیە لە وڵاتی نەرویج لە بواری گەشەپێدانی بەردەوام و پاراستنی ژینگە لە ڕێگەی:

• سوودوەرگرتن لە سامانی نەوت بۆ دەستخستنی سەرچاوەكانی وزەی نوێبووەوە.

• پابەندبوون بە بنەمای پاراستنی دەرامەتە سرووشتییەكان بۆ نەوەكانی داهاتوو.

• ئاسانكاریی دارایی بۆ هاندانی هاووڵاتیان بۆ كاركردن بە ئۆتۆمۆبێلی كارەبایی.

• پارێزگاریكردن لە فرەچەشنیی بایۆڵۆجی.

• بنیادنانی زۆرێك لە پاركی نیشتمانی و پارێزراوە سروشتییەكان و ناوچە كەناراوییەكان.

ئالنگارییەكانی پێش ئیكۆناشناڵیزم:

یەكەم: لەوانەیە پەیوەستكردنی ژینگەپارێزی بە ناسنامەیەكی نیشتمانییەوە، ببێتە مایەی دابڕان لە بەشێك لە خەڵك و ئەزموون و پێشكەوتنی جیهانی.

دووەم: لەوانەیە ببێتە هۆی دابەزینی ئاستی هاوكاریی نێودەوڵەتیی لە بواری ژینگەپارێزیدا.

سێیەم: لەوانەیە ببێتە هۆی تێكدانی پەیوەندیی نێوان وڵاتان، بەهۆی ڕەچاوكردنی بەرژەوەندیی تایبەتەوە.

ئایندەی ئیكۆناشناڵیزم

پێشبینی دەكرێت كە ئیكۆناشناڵیزم زیاتر گەشە بكات لە ئایندەدا بەهۆی:

یەكەم: داهێنان لە بواری وزە نوێبووەوەكان و زیاتر بەكارهێنانی تەكنۆلۆژیا.

دووەم: بەشداریكردنی كارای گەنجان لە ڕێگەی تۆڕەكانی پەیوەندییە كۆمەڵایەتییەكانەوە.

سێیەم: سەرهەڵدانی شۆڕشێكی كەلتووری بۆ گیڕانەوە و زیندووكردنەوەی دابونەریت و كەلەپووری خۆماڵی لەلایەن گەلانەوە.

چوارەم: هاتنەئارای سیستمێكی بەڕێوەبردنی ژینگەیی لە ڕێگەی پپكەوە كاراكردنی تەكنۆڵۆژیای نوێ و كەلتووری دێرین و تواناكانی گەنجان.