لە جیهانی سیاسەتی هاوچەرخدا، کاریگەریی سەرکردەکان تەنیا لە چوارچێوەی نوێنەرایەتیی فەرمیی حیزب و دامەزراوەکاندا قەتیس نابێت، بەڵکوو زۆر جار وەک خاوەنی "سەرمایەیەکی سیاسیی کەسی" مامەڵەیان لەگەڵ دەکرێت. نێچیرڤان بارزانی، وەک یەکێک لە دیارترین سەرکردەکانی هەرێمی کوردستان، نموونەیەکی بەرچاوی ئەم دیاردەیەیە. ئەم وتارە، بەشێکردنەوەی ڕۆڵی ناوبراو و بەکارهێنانی ڕووداوی هەڵگرتنی گەمارۆی ئاسمانیی تورکیا لەسەر فڕۆکەخانەی سلێمانی وەک نموونەیەکی بەرجەستە، هەوڵ دەدات ستراتیژییەت و شێوازی کارکردنی سیاسیی نێچیرڤان بارزانی ڕوون بکاتەوە.

دیپلۆماسیی کەسی وەک ئامرازێکی ستراتیژی

یەکێک لە گرنگترین تایبەتمەندییەکانی سیاسەتی نێچیرڤان بارزانی، پشتبەستنە بە "دیپلۆماسیی کەسی" وەک ئامرازێکی کاریگەر بۆ بەدیهێنانی ئامانجە ستراتیژییەکان. ئەم جۆرە لە دیپلۆماسییەت، لەبری پشتبەستن بە پرۆتۆکۆلە وشک و فەرمییەکان، لەسەر بنەمای پەیوەندیی ڕاستەوخۆ، متمانەی دوولایەنە و ڕێزی کەسیی نێوان سەرکردەکان بنیات دەنرێت. ڕووداوی هەڵگرتنی گەمارۆی سەر فڕۆکەخانەی سلێمانی، بەڕوونی ئەم شێوازە کارکردنە دەردەخات. وەڵامی سەرۆککۆماری تورکیا، ڕەجەب تەیب ئەردۆغان، کە دەڵێت "قسەی تۆ ڕەتناکرێتەوە، " نیشاندەری بوونی پەیوەندییەکی قووڵی کەسی و متمانەیەکی گەورەیە کە لە ماوەی چەندین ساڵدا لەنێوانیاندا درووست بووە. ئەم سەرمایە سیاسییە کەسییە وای کردووە کە داواکارییەک، کە پێشتر لە ڕێگەی کەناڵە فەرمییەکانەوە ڕەزامەندیی لەسەر نەدرابوو، لە چوارچێوەی پەیوەندییەکی کەسیدا یەکسەر جێبەجێ بکرێت. فەرمانی ڕاستەوخۆی ئەردۆغان لە ڕێگەی تەلەفۆنەوە بۆ بەرپرسانی فڕۆکەوانی، نیشانەی ئەوەیە کە دیپلۆماسیی کەسی دەتوانێت بەربەستە بیرۆکراسی و تەنانەت بڕیارە سیاسییە پێشووەکانیش تێبپەڕێنێت و ڕێگەکان کورت بکاتەوە.

ستراتیژییەتی نیشتمانی و تێپەڕاندنی دابەشکاریی جوگرافی

هاوتەریب لەگەڵ دیپلۆماسیی کەسی، ڕۆڵی نێچیرڤان بارزانی ڕەهەندێکی ستراتیژیی نیشتمانیشی هەیە. وەڵامی بە سەرۆک ئەردۆغان کە دەڵێت: "من سەرۆکی هەرێمی کوردستانم، نیوەشم سلێمانییە، " تەنیا گوزارشتێکی سادە نییە، بەڵکوو چەندین پەیامی گرنگی سیاسی لەخۆدەگرێت. ئەم وەڵامە جەختکردنەوەیە لەسەر ئەوەی کە دامەزراوەی سەرۆکایەتیی هەرێم، نوێنەرایەتیی تەواوی جوگرافیا و پێکهاتەکانی کوردستان دەکات، بەبێ جیاوازیی حیزبی و ناوچەیی. لە کاتێکدا کە فڕۆکەخانەی سلێمانی لە "زۆنی سەوز"دایە، هەوڵدانی سەرۆکی هەرێم بۆ چارەسەرکردنی کێشەکەی، پەیامێکی ڕوونە بۆ ناوخۆی کوردستان کە بەرژەوەندیی گشتی و نیشتمانی لە سەرووی بەرژەوەندیی حیزبی و جوگرافییەوەیە. وتەی "خەمی سلێمانیمە" نیشاندەری هەستکردنە بە بەرپرسیارییەتی بەرانبەر بە هەموو تاک و ناوچەیەکی هەرێمی کوردستان و وێنەی سەرکردەیەک نمایش دەکات کە خۆی بە خەمخۆری هەمووان دەزانێت. ئەم هەڵوێستە، هەوڵێکە بۆ بەهێزکردنی یەکپارچەیی سیاسی و کارگێڕیی هەرێم و کەمکردنەوەی کاریگەرییەکانی دابەشکاریی سیاسی لەسەر ژیانی هاووڵاتییان.

ئەگەر سەیری کارنامەی سیاسیی نێچیرڤان بارزانی بکەین، لە پۆستی سەرۆکوەزیرانەوە تا سەرۆکایەتیی هەرێم، دەبینین کە بەردەوام هەوڵی داوە لە چوارچێوەی حیزبیی تەسک دەربچێت و وەک دەوڵەتمەدارێک مامەڵە بکات. ڕووداوی هەڵگرتنی گەمارۆی سەر فڕۆکەخانەی سلێمانی، تەنیا چارەسەرکردنی کێشەیەکی کارگێڕی نەبوو، بەڵکوو بەرجەستەبوونی دوو ستراتیژیی گرنگ بوو لە یەک کاتدا؛ کە تێیدا دیپلۆماسیی کەسی و بەرپرسیارییەتیی نیشتمانی پێکەوە گرێدران و بوونە هۆی بەدەستهێنانی دەستکەوتێک کە خزمەتی بە بەرژەوەندیی گشتیی هەرێمی کوردستان کرد.