تۆڕی بەشداری سیاسی ژنانی ئەفغانستان، لە بەیاننامەیەکدا، چوارەمین ساڵڕۆژی گەڕانەوەی تاڵیبانیان بۆ سەر دەسەڵات بە ڕۆژێکی ڕەش لە مێژووی ئەو وڵاتە ناوبرد و ڕایگەیاند: کە گەلی ئەفغانستان لەم ماوەیەدا ڕووبەڕووی ستەم و ترس و هەژاری و دەستدرێژی و نادادپەروەری بوونەتەوە.

هەروەها تۆڕی بەشداری سیاسی ژنانی ئەفغانستان گرتەیەکی ڤیدیۆییان بڵاوکردەوە، کە تێیدا ژمارەیەک ژنانی ئەفغانی لە کردەوەیەکی ڕەمزیدا ناوی ئەو ڕێکخراوە نێودەوڵەتی و مافی مرۆڤانە دەدڕێنن کە لەسەر کاغەز لەبەردەم کامێرادا نووسیویانە.

تۆڕەکە ڕەخنەی توندی لە کۆمەڵگەی نێودەوڵەتی گرت و بە "سازانێکی شەرمەزارکەر" لەگەڵ تاڵیبان تۆمەتبار کرد و گوتی: جیهان نەک هەر پشتیوانی لە ژنانی ئەفغانستانی نەکرد، بەڵکو خەڵکیشی کردە قوربانی لە پێناو بەرژەوەندییە سیاسییەکانی خۆی بە ئاساییکردنەوەی پەیوەندییەکان لەگەڵ تاڵیبان.

لە ڕاگەیەندراوەکەدا هاتووە: "تاڵیبان بەشێوەیەکی سیستماتیک ژنانی لە گۆڕەپانەکانی کۆمەڵایەتی و سیاسی و پەروەردەیی دوورخستووەتەوە و بە سەپاندنی ڕەگەزپەرستی جێندەر، داهاتووی ژنانیان تاریک کردووە."

 

 

 

 

گوڵان: سەردار خەلیل