پسپۆرانی زانكۆی ماریلاند جەختیان كردووەتەوە كە سترێسی كار Job stress یان سترێس لە شوێنی كاردا زیانبەخشە بۆ تەندروستیی دڵ. كەمێك سترێس لە هەموو كارێكدا هەیە و بۆ هەر كەسێك كاردانەوەی تەندروستیی جیاوازی هەیە، هەروەها ئاستی سترێس دەگۆڕێت بە گوێرەی سرووشت و بارگرانیی كار. سترێسی كار هەندێك جار ماوە كورتە، بۆنموونە لە كاشێری مۆڵێك لەكاتی پشووەكان یان ژمێریارێك لە وەرزی وەرگرتنی باجدا، لێرەدا لەش هۆرمۆنەكانی سترێس وەكو كۆرتیزۆل و ئەدرینالین دەردەدات، ئینجا پاش سووكبوونی كارەكان، هەموو شتێك زوو ئاسایی دەبێتەوە و كاریگەری لەسەر تەندروستیی دڵ نابێت. بەڵام ئەگەر سترێسی كار بەدەوام بێت، ئەوا هۆرمۆنەكانی سترێس بەردەوام لە ئاستی بەرزدا دەمێننەوە و دەبنە هۆی بەرزبوونەوەی ئاستی كۆلیستیڕۆڵی خوێن و زیادبوونی ئەگەری نەخۆشیی دڵ. نیشانەكانی سترێسی كار: زیادبوونی لێدانەكانی دڵ، ئارەقەكردنی لەپی دەستەكان، بەرزبوونەوەی پەستانی خوێن، هەستكردن بە ماندووبوون، گرفتەكانی خەو، گرفت لە تەكیزكردن، زیاد تووشبوون بە هەڵامەت، هەروەها خواردنی خۆراكی ناتەندروست.