دوابەدوای هێرشی ئەمریکا بۆ سەر دامەزراوە ئەتۆمییەکانی ئێران، سیناتۆرەکانی ئەمریکا دابەشبوون، یەکێک لە دیموکراتە باڵاکانی لیژنەی هەواڵگریی ئەنجومەنی پیرانی ئەمریکا، ترەمپ تۆمەتبار دەکات بەوەی کە ستراتیژێکی ڕوونی نییە و وڵاتەکەی بەرەوڕووی ململانێیەکی دیکەی سەربازیی خستووەتەڕوو. ناوبراو، پێشنیاری لێپێچینەوەی دۆناڵد ترەمپی کرد: "پێویستە سەرۆک بەپەلە لەبەردەم کۆنگرێس ئامادە بێت".

سیناتۆری ڤێرجینیا مارک وارنەر، دیموکراتی باڵا لە لیژنەی هەواڵگری ئەنجومەنی پیرانی ئەمریکا، دۆناڵد ترەمپی تۆمەتبار کرد بەوەی کە ستراتیژێکی ڕوونی نییە و وڵاتەکەی دەخاتە مەترسییەوە بۆ ئەوەی وڵاتەکە بکێشێتە ناو ململانێیەکی دیکەی سەربازییەوە.

پێشنیاری لێپێچینەوەی دۆناڵد ترەمپی کردووە و دەڵێت: "دەبێت سەرۆک بەپەلە لەبەردەم کۆنگرێس ئامادەبێت".

بەگوێرەی ڕاپۆرتێکی ئاژانسی ڕۆیتەرز، سێنای ئەمەریکا لە دوای هێرشی ئەمریکا بۆ سەر سێ دامەزراوەی ئەتۆمی ئێران، کە بریتین لە فۆردۆ، ناتەنز و ئیسفەهان، سێنای ئەمەریکا دابەش بووە.

لەلایەکی دیکەوە، تۆم کاتێن، سیناتۆری ئارکانساس، سەرۆکی کۆمارییەکانی لێژنەی هەواڵگریی ئەنجومەنی پیرانی ئەمریکا، ڕایگەیاندووە کە ئێران ماوەی ٤٦ ساڵە “جەنگی تیرۆر” دژی ئەمریکای بەڕێوە بردووە.

گوتیشی: سەرۆک ترامپ بڕیارێکی دروستی دا و پێویستە ئایەتوڵڵاکان هۆشدارییەکەی لەبیربێت کە ئەمریکییەکان نەکەنە ئامانج، خوای گەورە هێزە ئازاکانمان بپارێزێت.

ئەمریکا سەرلەبەیانی ئەمڕۆ سێ شوێنی ئەتۆمی ئێرانی بۆردومان کرد، لەوانە ناتەنز، فۆردۆ و ئیسفەهان.

دوابەدوای ئەو هێرشە، دۆناڵد ترەمپ لە وتارێکدا گوتی: توانای ئەتۆمی ئێران بەتەواوی لەناوچووە.

لەم وتارەدا جەختی لەوە کردەوە کە باشترە ئێران کاردانەوەی نەبێت.

ترامپ "پیرۆزبایی" لە هێرشی هێزە ئەمریکییەکان بۆ سەر شوێنە ئەتۆمییەکانی ئێران کرد.

هەروەها دەڵێت: لەگەڵ سوپای ئەمریکا کاریان لەسەر هێرشەکە کردووە "وەک باشترین تیم".

 

 

 

گوڵان: سەردار خەلیل