هەندێك جۆری ئارایشت ماددەی زیانبەخش لەخۆدەگرن كە كاریگەریی نەرێنی دەكەنە سەر پێست، بۆنموونە فۆرمەلدیهاید، SLES، پارابینەكان Parabens، ترشی گلایكۆلیك، ترشی سالیسیلیك، بۆیەی جۆراوجۆر لەگەڵ چەند ماددەیەكی تر كە هۆكارن بۆ: گیرانی كونەكانی پێست و پەیدابوونی زیپكە و زیوان، وشكبوونی پێست، لۆچبوونی پێشوەختە یان زووپیربوونی پێست، سووتانەوەی چاوەكان، وشكبوون و قڵیشانی لێوەكان، زیاد هەستیاربوونی پێست، گەورەبوون و بەرجەستەبوونی كونەكانی پێست، هەروەها هەستەوەریی پێست بە شێوەی سووتانەوە و خورشت و سووربوونەوە. ڕێنمایی بۆ پاراستنی پێست لە ماددە زیانبەخشەكانی ئارایشت: دڵنیابوون لە هەڵبژاردنی ئارایشتی گونجاو كە ماددەی زیانبەخشی تێدا نەبێت، شووشتنی دەموچاو بە ئاو و سابوون و بەكارهێنانی شێداركەرەوەی پێست Moisturizer پێش ئارایشت كردن، بەكارهێنانی ئاوێتەی دژەخۆر پێش ئارایشت، پاككردنەوەی ئارایشت بە باشی پێش نووستن، هەروەها پاك ڕاگرتنی هەموو پێداویستەكانی ئارایشت.