زمانەی قوڕگ Uvula بریتییە لە شانەیەكی نەرم كە لە سەرەتای قوڕگدا بە بەشی پشتەوەی مەڵاشووی نەرمدا ئاوێزانە، ئەم زمانەیە لەكاتی قووتدانی خۆراك و شلەدا یارمەتی داخستنی رێڕەوەكانی لووت دەدات، هەروەها هانی پاڵنانی خۆراك بۆ ناو قوڕگ دەدات. هۆكارەكانی هەوكردن و ئاوسانی زمانەی قوڕگ: هەوكردن بە بەكتریا یان ڤایرۆس كە دەبێتە هۆی ئاوسان و سووربوونەوە، هەڵامەت، زیاد هەناسەوەرگرتن بە دەم بەهۆی گیرانی لووت، یان هەر هۆكارێكی دیكە، وشكبوونی دەم لەبەر هەر هۆكارێك، هەستەوەری، گەڕانەوەی ترشەلۆكی گەدە بۆ بەشی سەرەوەی سوورێنچك و قوڕگAcid reflux . هۆكارە هاندەرەكانی هەوكردن و ئاوسانی زمانەی قوڕگ: جگەرەكێشان، خواردنەوەی ئەلكهول، هەڵمژینی هەوای پیس بە ماددەی كیمیایی، زەبر و برینداربوونی قوڕگ، لاوازبوونی سیستمی بەرگریی لەش. نیشانەكانی هەوكردن و ئاوسانی زمانەی قوڕگ: هەستكردنی بەردەوام بە بوونی تەنێكی بیانی لە قوڕگدا، ئازار و ناڕەحەتیی بەردەوامی قوڕگ، هەستكردن بە كڕانەوە و خورشت لە قوڕگدا، هەندێك جار كۆكە، گرفت لە قووتدانی خۆراك و شلەدا، گرفت لە هەناسەدا، ئاوسانی لەوزەكان، زیادبوونی دەردانی لیك، بەرزبوونەوەی پلەی گەرمیی لەش. چارەسەر بریتییە لە بەكارهێنانی غەرغەرە و دەرمانی دژەمیكرۆب، لەگەڵ دووركەوتنەو لە هۆكارە هاندەرەكانی هەوكردن و ئاوسانی زمانەی قوڕگ.