ساخلەمیا دهۆكێ: پتریا تووشبوویێن كۆرۆنایێ ژ مووسل و بەغدا ڤەگەریاینە دهۆكێ
حەمزە رەزیكی، بەرپرسێ راگەهاندنێ ل رێڤەبەریا گشتی یا ساخلەمیا پارێزگەها دهۆكێ دیار كر كو: "هەتا نۆكە ل دهۆكێ 288 نەخۆشیێن كۆرۆنایێ یێن هاتینە تۆماركرن پتریا وان ژی ژ مووسل و بەغدا یێن ڤەگەریاینە پارێزگەها دهۆكێ وپشتی ل تاقیگەهێن ساخلەمیێ ل دهۆكێ و قەزا ئاكرێ پشكنینێن كۆرۆنایێ بۆ وان هاتینە كرن دیاربوویە هەلگرێ نەخۆشیا كۆرۆنایێ نە. گەلەك ژوان ژی پاسەوانن ل پارێزگەهێن عێراقی كاردكەن. نۆكە ل دهۆكێ دناڤ سێ نەخۆشخانەیان دا تووشبوویێن كۆرۆنایێ دهێنە چارەسەركرن".
خۆیا ژی كر كو: "سەرجەمێ 288 نەخۆشیێن كۆرۆنایێ یێن دهۆك هاتینە تۆماركرن ژوانا 190 نەخۆش یێن هاتینە چارەسەركرن یێن دیتر ناڤ نەخۆشخانێ دا ماینە چارەسەری وەردگرن. ئەو تووشبوویێن دوهی ژی ل دهۆكێ هاتینە تۆماركرن چار ژی ژ مالیزیا یێن ڤەگەریاینە دهۆكێ وچەندین نەخۆش بەركەفتیێن تووشبوویێن كۆرۆنایێ نە دهێنە دەستنیشانكرن".
باسنیوز
