لە ١٥ی حوزەیرانەوە، هەدەپە لە دوو شوێنەوە بەپێ بەرەو ئەنقەرە بەڕێ كەوتن، كە یەكەمیان لە ئێدیرنەوە بەرەو ئەنقەرە و ئەوەی تریش لە هەكارییەوە بەرەو ئەنقەرە، ئامانج لەو رێپێوانەش ئیدانەكردنی لێسەندنەوەی ئەندام پەرلەمانی بوو لە دوو ئەندام پەرلەمانی هەدەپە و هەروەها قەیوومدانان بۆ سەرۆک شارەوانییەكانیان بوو لە باكوور. دوای پێنج رۆژ لە رێپێوان، رێپێوانەكە كۆتایی پێ هات.

بەهۆی بوونی ڤایرۆسی كۆرۆنا لە توركیا، حكوومەت رێگەی نەدا رێپێوانەكە بهێنرێتە ناو شاری ئەنقەرە، بۆیە هەریەك لە پەروین بوڵدان و مەدحەت سەنجار هاوسەرۆكانی هەدەپە، لەناو پاركی بارەگای پەرلەمانی توركیا میتینگێكیان ساز کرد و گوتیان رێپێوانەكە بۆ ئازادی و دادپەروەری ئەنجامی باشی هەبووە.

پەروین بوڵدان گوتی: "ئەم رێپێوانە فراوانە، بۆ هێنانەدیی ئازادی، یەكسانی و ئاشتی و ئارامی بەبێ بچڕان بەردەوام دەبێت، چونكە رێپێوانەكەمان ئەنجامی گرنگی بەدەست هێنا".

هەدەپە بەنیازە لە داهاتوودا لە رێگەی رێپێوان و خۆپیشاندانەوە دژی ئەو ستەمانە بوەستێتەوە كە لەلایەن حكوومەتەوە بەرامبەریان دەكرێت.






باسنيوز