50 گوند ل دەركارا زاخۆ ژ ئەگەرێ پەكەكێ و توركیا چۆلكرینە
زێرەڤان موسا، رێڤەبەرێ ناحیا دەركارێ ل سنۆرێ قەزا زاخۆ، دیاركرن: "ناحیا دەركارێ سەر ب قەزا زاخۆ ڤە، جهەك ستراتیجی یە، چونكە دكەڤیتە ناڤا دۆل و نهالان و دەڤەرەكا چیایی یە، لێ ب دلگرانی ڤە ژ ئەگەرێ هەبوونا بنگەهێن پارتا كرێكارێن كۆردستانێ (پەكەكێ) ئەڤ دەڤەرە بەرەڤ ئالۆزیان ڤە چوویە كو بەردەوام شەر دناڤبەرا توركیا و پەكەكێ ل سەر ئاخا ئەڤێ دەڤەرێ دهێتە ئەنجام دان" و گۆت ژی: " ل سنۆرێ ناحیا دەركارێ، 63 گوند مە هەنە و ژ وی سەرجەمی بتنێ 13 گوند د ئاڤاكری نە و 50 گوند ژ ئەگەرێ پەكەكێ و توركیا، خەلكێ چۆلكرینە و نەچار بووینە قەستا باژێران بكەن".
ناڤبری ئاماژە ب وێ چەندێ ژی دا: "هەتا نۆكە مە چ ئامارەكا دروست پەیدا نەكریە چ زیانێن ماددی هەبوونە چونكە جهێن بۆردومانێ د مەترسیێ دا نە و لێژنێن دیڤچوونێ نەشێن قەستا وان جهان بكەن و رۆژانە ژلایێ توركیا ڤە ، بۆردومان دهێتە ئەنجام دان".
زێرەڤان موسا ئاماژە ب وێ چەندێ ژی دا: "11 گوندێن كوردێن كریستیان مە هەنە و ب دلگرانی ڤە بتنێ 2 گوندێن كوردێن كریستیان د ئاڤاكری نە و 9 گوند ژ ئەگەرێ پەكەكێ هاتینە چۆلكرن و زێدەباری وێ چەندێ كو گوندەكێ كریستیانان هەیە ب تەمامی ئاڤاكری یە و كەرتێ هەمو خزمەتگوزاریان بۆ هاتیە دابینكرن و نێزیكی 25 مالان لێ هەنە، لێ ژ ئەگەرێ نە ئارامیا دەڤەرا مە، خەلكێ وی گوندی گوندێ خۆ چۆلكریە و نەچار بووینە قەستا گوندێن دیتر و سەنتەرێ زاخۆ بكەن".
رێڤەبەرێ ناحیا دەركارێ ئەو چەندە ژی نەڤەشارت: "هەتا نۆكە 4 كەس ل سنۆرێ ناحیا دەركارێ شەهید بوونە كو خەلكێ سڤیلێ قەزا زاخۆ بوونە و د هەمان دەم دا ئێك ژ وان شەهیدان كوردەكێ ئێزدی بوویە. خەلكێ ناحیا دەركارێ هەلبەت دخازیت پەكەكە گوندەوارێن وان چۆل بكەن چونكە ب چۆلبوونا گوندێن سنورێ دەركارێ ژ پەكەكێ، مە باوەری هەیە دێ ئێمناهی ل دەڤەرێ پەیدا بیت".
لدیڤ پێزانینێن باسنیوز، نێزیكی 80 گوندان ل سنۆرێ قەزا زاخۆ ژ ئەگەرێ هەبوونا بنگەهێن پارتا كرێكارێن كوردستانێ (پەكەكێ) هاتینە چۆلكرن و رۆژانە ژلایێ فرۆكێن تۆركیا ڤە دهێنە بۆردومانكرن.
باسنیوز
