دھۆك.. 7 رۆژە تەرمێ سنێلەكێ ل شێلادزێ نەهاتیە دیتن
رۆژهات حاجی رێكانی، ژ تیما نقۆمڤانێن بنگەهێ بەرەڤانیا باژێری ل شێلادزێ دا دیاركرن: " ل رێكەفتی 12/6/2020 ل رۆژا ئەینی یا دەرباز بووی، گەنجەك ب ناڤێ(ح.ش) كو ژدایك بوویێ سالا 2004 یە، ل ناڤا ئاڤا رویبارێ زیێ مەزن دا خەندقی یە و تا نۆكە تەرمێ وی نەهاتیە دیتن و گۆت ژی: "هەر چەندە 7 رۆژ لسەر خەندقینا وی دەرباز بوونە لێ دلگرانی ڤە تەرمێ وی تا نۆكە ل چ جهەكێ دیار نەبوویە".
رۆژهات حاجی ژ تیما نقۆمڤانێن ناحیا شێلادزێ ئاماژە ب وێ چەندێ ژی دا:" ژ بەر كو ئاڤا رویبارێ زیێ مەزن ئاڤەكا بند و بهێزە و زێدەباری وێ چەندێ جهێن ئاسێ و بەرزە ل ناڤا ئەڤی رویباری دا هەنە و هەر جارەكا كەسەك ل ناڤا ئەڤی رویباری خەندقی بیت، زوی تەرم ناهێتە دیتن".
ناڤبری ئاماژە ب وێ چەندێ ژی دا:" دیتنا تەرما ل ناڤا رویبارا دا یا بساناهی نینە چونكە تەرم دگەل ئاڤێ بۆ دەڤەرەكا دیتر دهێت ڤەگۆهاستن لێ تیمێن مە بەردەوامن ژ لێگەریانا تەرمێ وی سنێلەی و زێدەباری كۆ هژمارەكا زۆر یا خەلكێ ناحیا شێلادزێ دگەل تیمێن مە دهاریكارن ژ كارێ لێگەریانا تەرمی دا و هیڤیخوازین زوترین دەم ئەم بشێن ئەوی تەرمی ببینین و رادەستی كەس و كارێن وی بكەین".
باسنیوز
