شه‌ڤا ده‌ربازبووی، د روینشتنه‌كا رۆژنامه‌ڤانیدا، فه‌رهاد ئه‌مین ئەترووشی، پارێزگارێ دهۆكێ چه‌ندین بابه‌ت و ته‌وه‌ر رۆن كرن و د به‌رده‌وامیا ئاخفتنێن خودا باس ل پێگیریا خه‌لكێ كر و گۆت: ل به‌راهیێ خه‌لكێ زۆر پێگیری ب رێنمایان دكر لێ نها پێگیریا وان لاواز بوویه‌.

فه‌رهاد ئه‌مین ئەترووشی، پارێزگارێ دهۆكێ ئه‌و چه‌نده‌ دیار كر: "د كۆمبونا دوماهیێدا یا (لێژنا بالا)یا به‌رهنگاربوونا ڤایرۆسێ كورۆنایێ، مه‌ وه‌ك‌ پارێزگه‌ها دهۆكێ ته‌كه‌ز ل سه‌ر وێ چه‌ندێ كر كو پێتڤیه‌ ئه‌م پێگیر بین و ئه‌و خه‌لكێ حه‌ز بكه‌ت مه‌ ل دیڤ خۆ را ببه‌ت ئه‌م ئه‌وێ چه‌ندێ نه‌هێلین. مە دڤێت وەكە حكومەت ئه‌وی خه‌لكی ل دیڤ خۆ را ببه‌ین و پێگیریێ ب رێنمایان بكه‌ین و گۆت ژی: زێده‌باری كو پتریا جهێن قه‌ده‌غه‌ كری د ڤه‌كری نه‌ لێ هێشتا گه‌له‌ك جهێن دیتر مانه‌ و هێشتا د گرتی نه‌ و ئه‌م وه‌كه‌ پارێزگارێ دهۆكێ دگه‌ل وێ چه‌ندێ نه‌ ئه‌و جهه‌ گرتی بمینن جارێ، چونكه‌ ئه‌و جهه‌ به‌رده‌وام لێ دبیته‌ قه‌ره‌بالغی و ده‌ستدان و تێكهه‌ل بوون ل وان جهان هه‌یه‌ و به‌رۆڤاژی ئه‌م دژایه‌تیا چ جهه‌كێ ناكه‌ین".

پارێزگارێ دھۆكێ دوپاتی ل سه‌ر وێ چه‌ندێ ژی كر‌: "وه‌لاتێن ده‌وروبه‌رێن مه‌ مینا(عیراق و توركیا و ئیران)، هێشتا مه‌ترسیا كورۆنایێ لێ به‌رده‌وامه‌ و دڤێت ئه‌م ژی پتر هشیاری ره‌وش و ساخله‌میا خۆ بین".

ناڤبری ئاماژه‌ ب وێ چه‌ندێ ژی دا‌، ل ده‌ستپێكا هاتنا ڤایرۆسێ كورۆنایێ خه‌لكێ پارێزگه‌ها دهۆكێ گه‌له‌ك پێگیری ب رێنمایان كریه‌ و دگه‌ل مه‌ هاریكار بوویه‌ لێ پشتی مه‌ بازار ڤه‌كرین و ڤه‌كرنا وان ژ پێخه‌مه‌ت پركرنا پێتڤیێن خه‌لكێ بوویه‌ نهادا خه‌لك ل ناڤا بازاران ب دلگرانی ڤه‌ پێگیریێ ب رێنمایان ناكه‌ن و دیار كر ژی: "گه‌له‌ك جاران مه‌ كامیره‌ ل ناڤا بازارێ دهۆكێ جێگیر كرینه‌ بو ده‌مێ(10) خوله‌كان و ب دلگرانی ڤه‌ (99%) خه‌لكێ پێگیر نینه‌ ب رێنمایێن ساخله‌میێ".

فه‌رهاد ئه‌مین ئەترووشی، پارێزگارێ دهۆكێ ئاماژه‌ ب وێ چه‌ندێ ژی دا: لدۆر قه‌ده‌غه‌یا هاتن و چوونێ بێ دوو دلی دێ ل سه‌رانسه‌ری پارێزگه‌هێ قه‌ده‌غه‌ هێته‌ بجەئینان و مه‌ وه‌كه‌ پارێزگه‌ها دهۆكێ گه‌له‌ك قوربانی داینه‌ ژ پێخه‌مه‌ت باشبوونا ره‌وشا ساخله‌میێ و دێ ل رۆژێن جه‌ژنا ره‌مه‌زانا پیرۆز ژی ژ پێخه‌مه‌ت پاراستنا گیانێ خه‌لكێ، قه‌ده‌غه‌ هێته‌ راگەھاندن و بجەئینان.











باسنيوز