بەڕێوەبەرایەتیی گشتیی تەندروستیی گەرمیان رایگەیاند، پشکنینی ڤایرۆسی کۆرۆنای 145 کەسی گەرمیان پاک دەرچوو.

بەپێی راگەیێندراوی بەڕێوەبەرایەتیی گشتیی تەندروستیی گەرمیان، "لەچوارچێوەی ھەڵمەتە بەردەوامەکانی تیمەکانی تەندروستیی گەرمیان بۆ ئەنجامدانی پشکنینی ڤایرۆسی کۆرۆنای نوێ بۆ چین و توێژەکان، لە دوو رۆژی رابردوودا نموونەی پشکنین لە 145 ھاووڵاتی وەرگیرا، خۆشبەختانە ئەنجامی سەرجەم نموونەکان پاکبوون."

لە راگەیێندراوەکەی تەندروستیی گەرمیاندا باس لەوەکراوە، "ئەو ھاووڵاتیانەی پشکنینیان بۆکراوە نیشتەجێی گەڕەکەکانی حەمرین، شێروانە و رووناکی بوون لە قەزاکانی کەلار و کفری و ھەردوو ناحیەی مەیدان و باوەنوور."

لە چوارچێوەی رێکارەکانی بەرەنگاربوونەوەی کۆرۆنادا، لە شارەکانی هەرێمی کوردستان تێستی هەڕەمەکی وەردەگیرێت.

ئێوارەی ئەمڕۆ 19-04-2020، تەندروستیی هەولێر رایگەیاند کە حەوت تووشبووی کۆرۆنا چاکبوونەتەوە، هەروەها لە هەڵەبجەش کەسێک چاکبووەوە و بە چاکبوونەوەی ئەو تووشبووەش ئێستا کۆی گشتیی ئەو کەسانەی لە هەرێمی کوردستان چاکبوونەتەوە گەیشتە 268 کەس. تاوەکو ئێستاش چوار کەس گیانیان لەدەستداوە.











رووداو