پشتی كو قەدەغەیا هاتن و چوونێ‌ ل هەرێما كوردستانێ‌ دەستپێكری، بەنكا خوینێ‌ ل دهۆكێ‌ ژی خەلكی ڤالا بویە ژ بو وەرگرتنا خوینا زێدە بو خەلكێ‌ پێتڤی و رێڤەبەرێ‌ بەنكا خوینێ‌ ل دهۆكێ‌ ب رێكا (باسنیوز) داخازیەكێ‌ ئاراستەی جهێن پەیوەندیدار دكەت.

رێڤەبەرێ‌ بەنكا خوینێ‌ یە ل پارێزگەها دهۆكێ‌ د داخویانیەكێ‌ دا دیاركرن: "ژ بەر كو بەری قەدەغەیا هاتن و چوونێ‌ رۆژانە خەلكێ‌ خوبەخش و خێرخوازان قەستا بەنكا خوینێ‌ ل دهۆكێ‌ كر ژ پێخەمەت وێ‌ چەندێ‌ خوینا زێدە پێشكێشی مە بكەن و ئەم ژی رۆژانە خوینێ‌ لسەر نەخوشخانە و كەسێن پێتڤی دا بەلاڤ دكەین و گوت ژی: ژ ئەگەرێ‌ قەدەغەیا هاتن و چوونێ‌ هەلبەت خەلك نەشێت ژ مالێن خو دەركەڤیت و نەشێن قەستا بەنكا خوینێ‌ بكەن لەورا نها دا مە چ (خوین) ل بەر دەست نەمایە و (ئامیرێن مە یێن تەزاندنێ‌) ڤالا بوونە و چ خوین تێدا نەمایە و ب ڤی رەنگی رەوشا بەنكا خوینێ‌ ب باشی ناهێتە دیتن".

هەمان رێڤەبەری ئەو چەندە ژی گوت: "بەنكا خوینێ‌ ل دهۆكێ‌ بەری نها رۆژانە (100) بوتلێن خوینێ‌ ژ خەلكی وەردگرتن و ل نك خو د هەلگرتن و نها دا مە چ خوین ل بەنكا خوینێ‌ نەمایە و مە زور پێتڤی پێ‌ هەیە و گوت ژی: ئەم رۆژانە خوینێ‌ ل سەر نێزیكی(10) نەخوشخانان بەلاڤ دكەین و ئەو كەسێن نەخوشیێن گران هەی مینا (تەلاسیمێ‌ و نەخوشیا گران و نەخوشخانا ژ دایك بوونێ‌ و نەخوشێن گولچیسكان) ئەڤان هەمویان رۆژانە پێتڤی ب خوینێ‌ هەیە و چ خوین ل بەر دەستێ‌ مە نەمایە".

ناڤبری تەكەز ل سەر وێ‌ چەندێ‌ ژی كر : مە پێتڤی ب هەمی جورێن خوینێ‌ هەیە و ئەم ب رێكا (باسنیوز) دخازم میكانیزمەك ژلایێ‌ هێزێن ئێمناهیێ‌ و رێڤەبەریا ساخلەمیێ‌ ڤە بهێتە دانان بو وان كەسان ئەوێن بەرهەڤ بن بهێن خوینێ‌ پێشكێش مە بكەن چونكە هەر رویدانەكا نەچاڤەرێكری رویبدەت، مە چ خوین ل بەر دەست نینە بكار بینین"










باسنیوز