ئەنجوومەنی دادوەریی هەرێمی کوردستان لە نووسراوێکدا لیستی ئاماری ئەو راگیراوانه‌ی كه‌ ئازاد ده‌كرێن به‌ ده‌سته‌به‌ری و ئه‌و زیندانییانەی كه‌ سزادراون و به‌ ئازادكردنی به‌مه‌رج، ئازاد ده‌كرێن ئاراستەی سەرۆکایەتیی هەرێمی کوردستان دەکات.

له‌ نووسراوه‌كه‌ی ئه‌نجوومه‌نی دادوه‌ریدا كه‌ ئاراسته‌ی سه‌رۆكایه‌تی هه‌رێمی كوردستان/ نووسینگه‌ی تایبه‌تیی سه‌رۆكی هه‌رێمی کوردستان كراوه‌، هاتووه‌، ئاماری ئەو راگیراوانەی بە دەستەبەری (کەفالەت) ئازاد دەکرێن لە سنووری هەر چوار سەرۆکایەتیی دادگای تێهەڵچوونەوەی ناوچەی هەولێر، سلێمانی، دهۆک و کەرکووک - گەرمیانن.

ئەو زیندانییانەی بە مەرج ئازاد دەکرێن لە چاکسازییەکانی پارێزگاکانی هەولێر، سلێمانی و دهۆک ن.

راگەیێندراوەکەی ئەنجوومەنی دادوەری دەڵێت، كۆی گشتیی ئازادكردنی گیراوه‌كان و به‌ردانی به‌ مه‌رج له‌ هه‌ر چوار دادگای تێهه‌ڵچوونەوەی هه‌رێمی کوردستان هەزار و 474 كه‌سن کە بەمشێوەن:

له‌ سه‌رۆكایه‌تیی دادگای تێهه‌ڵچوونه‌وه‌ی هه‌ولێر 812 گیراو ئازادكراون و له‌و ژماره‌یه‌ به‌ردانی به‌ مه‌رج 26 كه‌سه‌.

له‌ سه‌رۆكایه‌تیی دادگای تێهه‌ڵچوونه‌وه‌ی سلێمانی 440 گیراو ئازاد كراون و له‌و ژماره‌یه‌ به‌ردانی به‌مه‌رج 12 كه‌سه‌.

له‌ سه‌رۆكایه‌تیی دادگای تێهه‌ڵچوونه‌وه‌ی دهۆك ژماره‌ی ئازادكردنی گیراوه‌كان 170 كه‌سه‌ و 30 كه‌سیان به‌ردانی به‌ مه‌رجه‌.

له‌ سه‌رۆكایه‌تیی دادگای تێهه‌ڵچوونه‌وه‌ی ناوچه‌ی كه‌ركووك - گه‌رمیان 21 راگیراو ئازاد كراون له‌گه‌ڵ یه‌ك نه‌وجه‌وان.

ئەنجوومەنی دادوەری دەڵێت، پرۆسه‌ی ئازادکردنی راگیراوان و ئازادكردنی به‌ مه‌رج به‌رده‌وام ده‌بێت و له‌ رۆژانی داهاتوودا ئاماری نوێ بڵاو ده‌كرێته‌وه‌.










رووداو