نێچیرڤان بارزانی، سەرۆکی هەرێمی کوردستان بەبۆنەی جەژنی(ئەتیکۆ) سەری ساڵی نوێی بابلیی ئاشوورییەوە پەیامێکی پیرۆزبایی بڵاوکردەوە.



لە بەشێکی پەیامەکەدا کە وێنەیەکی بۆ(باسنیوز) نێردراوە هاتووە"کوردستان وەك هەمیشە لانكه‌ى پێکەوەژیان، لێبوردەیی، مرۆڤدۆستییە و رۆڵە کریستیانەکانیشی پێکهاتەی رەسەن و کۆڵەکەیەکی گرنگی ئەم کولتووره‌ن، کە دەبێ بە هەموو شێوەیەك بیپارێزین و بەهێزتری بکەین".


ئەمەی خوارەوە دەقی پەیامەکەی سەرۆکی هەرێمی کوردستانە:-



بە بۆنەی هاتنەوەی جەژنی (ئەکیتۆ) سەری ساڵی نوێی بابليى ئاشووریيەوە، گەرمترین پیرۆزبایی لە ته‌واوى خوشك و برایانی کلدانی، ئاشووری و سریانی لە کوردستان و عێراق و جیهان دەکەم، هیوادارم ئەم بۆنەیە مایەی خێر و خۆشی و گەڕانەوەی ئومێد و ئارامی بێت بۆ کوردستانیيان و هه‌موو گەلانی جیهان، کە بە هۆی پەتای کۆرۆناوە دووچاری دۆخێکی دژوار و نەخوازراو بوونه‌ته‌وه‌.

هەر بەم بۆنەیەوە جەخت لە گرنگیی هەماهەنگی و هاوکاریی هەموو دامودەزگا فەرمییەکان و لایەن و پێکهاتەکانی کوردستان پێکەوە دەکەمەوە، بۆ پابه‌ندى به‌ ڕێنماييه‌كانه‌وه‌ و گرتنەبەری رێگەی دروست و پێویست لە پێناو تێپەڕاندنی ئەم دۆخەدا بە سەرکەوتوویی.

کوردستان وەك هەمیشە لانكه‌ى پێکەوەژیان، لێبوردەیی، مرۆڤدۆستییە و رۆڵە کریستیانەکانیشی پێکهاتەی رەسەن و کۆڵەکەیەکی گرنگی ئەم کولتووره‌ن، کە دەبێ بە هەموو شێوەیەك بیپارێزین و بەهێزتری بکەین.

جەژنی ئەکیتۆ لە خوشك و برایانی کریستیانمان پیرۆز بێت و هیوادارم پێکەوە جەژن و بۆنەکانی داهاتوومان لە دۆخێکی باشتردا، لە سایەی پێکەوەژیان و ئاشتی و ئارامیدا بکەینەوە.

خوای مه‌زن کوردستان و کوردستانییان و تەواوی گەلانی جیهان بپارێزێت.

نێچیرڤان بارزانی

سەرۆکی هەرێمی کوردستان

31/3/2020