قایمقامیەتی چەمچەماڵ لە راگەیێندراوێکدا ئاماژە بەوە دەکات، بە هەوڵی قایمقامی چەمچەماڵ توانرا بۆ ئەم مانگە دابەشکردنی مووچەی مامۆستایانی پەروەردەی کوردیی کەرکووک ببرێتەوە ئەو شارە کە پێشتر لە چەمچەماڵ دابەشدەکرا.

رۆژی شەممە 28-03-2020 قایمقامیەتی چەمچەماڵ لە راگەیێندراوێکدا رایگەیاند، "رەمەک رەمەزان، قایمقامی چەمچەماڵ بە مەبەستی کارئاسانی بۆ کەسوکاری شەهیدان و مامۆستایانی پەروەردەی کوردی لە کەرکووک سەردانی بانکی چەرمووی کرد".

لە راگەیێندراوەکەدا داوا لە سەرجەم مامۆستایانی پەروەردەی کوردی لە کەرکووک کراوە، سەردانی چەمچەماڵ مەکەن و لە شاری کەرکووک و لە دیوانی بەڕێوەبەرایەتیی پەروەردە مووچەکانیان دابەشدەکرێت.

لە ساڵی 2017ەوە مووچەی حەوت هەزار و 500 مامۆستا و فەرمانبەری پەروەردەی کوردی لە کەرکووک لە شاری چەمچەماڵ دابەش دەکرێت. ئێستا بۆ کارئاسانی و لەبەر ئەوەی بەهۆی قەدەخەی هاتووچۆوە گرفتیان بۆ دروستنەبێت، مووچەکانیان براوەتەوە بۆ کەرکووک.





رووداو