وەزارەتی تەندروستیی حکوومەتی هەرێمی کوردستان رای گەیاند، ڕاگرتنی جموجۆڵ و هاتوچۆ، کاریگەرییەکی زۆر باشی لە ڕێگەگرتن لە بڵاوبوونەوەی ڤایرۆسی کۆرۆنا هەبووە و داوای درێژکردنەوەی قەدەغەی هاتوچۆی کرد.

لە ڕاگەیاندراوێکدا کە کەمێک لەمەوبەر (چوارشەممە ١٨ی ئاداری ٢٠٢٠) بڵاوی کردووەتەوە، وەزارەتی تەندروستی سوپاسی هاووڵاتیانی هەرێمی کوردستانی کردووە و ئاماژەی بەوە داوە کە لە ماوەی ڕۆژانی ڕابردوودا بەهۆی ڕاگرتنی جموجۆڵ و هاتوچۆ، کاریگەریی زۆر باش هەبووە لە ڕێگەگرتن لە بڵاوبوونەوەی ڤایرۆسی کۆرۆنا.

هاوکات وەزارەتی تەندروستی سوپاسی وەزارەتی ناوخۆ و پارێزگاکان و ئیدارەکان و دامودەزگا ئەمنییەکانی کردووە و داوای درێژکردنەوەی قەدەغەکردنی هاتوچۆ و بەردەوامبوونی هاووڵاتیانی لە ماڵەکانیان کردووە.

بە گوێرەی بڕیاری وەزارەتی ناوخۆ، لە شەوی ١٥ لەسەر ١٦ی ئاداری ٢٠٢٠ەوە بۆ ماوەی ٧٢ کاتژمێر، قەدەغەی هاتوچۆ لە هەرێمی کوردستان راگەیاندراوە.





باسنيوز