هۆشیار سیوەیلی، بەرپرسی مەکتەبی پەیوەندییەکانی دەرەوەی پارتی دیموکراتی کوردستان، پێشوازیی لە شاندێکی دەزگای ئۆیکۆس/ ئەڵمانیای فیدراڵ، بە سەرۆکایەتیی بەرێز دەیڤد میۆلەر، بەرپرسی کاروباری سیاسیی دەزگاکە بۆ ئازادیی ئایینی و کەمینەکان لە عێراق و ڕۆژھەڵاتی ناوەڕاست و، شاندێکی یاوەری، کە پێک هاتبوون لە مایکل وۆڵف، جێگری سەرۆکی دەزگای ئۆیکۆس شتیفتۆنگ بۆ چاودێریکردنی پرۆژەکانی دەزگاکەیان لە کوردستان و عێراق و، خاتوو ڕێچکا، ڕاوێژکاری بواری کەلتووریی دەزگای ناوبراو کرد.



لەو دیدارەدا، کە ئەندامانی مەکتەب ئامادە بوون، بەرپرسی پەیوەندییەکانی دەرەوەی پارتی دواپێشهاتەکانی هەرێمی کوردستان و عێراق و ناوچەکەی بۆ شاندی میوان باس کرد و ڕایگەیاند، هاوکارییەکانی حکوومەتی ئەڵمانیای فیدراڵ بەرز دەنرخێنین، بەتایبەتی هاوکاریی مرۆیی بۆ ئاوارەکان و هاوکاریی سەربازی بۆ مەشقی هێزی پێشمەرگەی کوردستان.



بەشێکی دیکەی ئەو دیدارە گفتوگۆ بوو دەربارە پەیوەندییەکانی نێوان حکوومەتی هەرێمی کوردستان و حکوومەتی فیدراڵیی عێراق و دواین هەوڵی پێکهێنانی کابینەی نوێی حکوومەتی فیدراڵ.



پرسی ئاوارەکانی شەڕی داعش بەشێکی دیکەی گفتوگۆکان بوو، بەڕێز سیوەیلی دۆخی پێکهاتە ئایینی و ئیتنیکیەکانی کوردستان و عێراقی بۆ شاندی میوان ڕوون کردەوە و گوتی، بارودۆخی ئاوارەکان بەگشتی باش نییە، لەبەر ئەوەی بە هۆکاری نەبوونی ئەمنیەت و خزمەتگوزاری و کار توانای گەڕانەوەیان بۆ جێگای خۆیان نییە، بەتایبەتی ئاوارەکانی دەشتی نەینەوا و مووسڵ.



لە درێژەی دانیشتنەکەدا باس لە گرنگیدان بە پرسی ئاوارەکان و جینۆسایدی کوردانی ئێزدی لەلایەن ڕێکخراوی تیرۆریستیی داعشەوە خرایە ڕوو و بە فراوانی باسی میکانیزمی هاوکاریی مرۆیی کرا، تاکو ئاوارەکان بتوانن بگەڕێنەوە و دووبارە ژیان بنیات بنێنەوە و بگەڕێنەوە ناوچەکانی خۆیان و نەچنە دەروەی وڵات، چونکە ئەوان خەڵکی ڕەسەنی ناوچەکەن. بەرپرسی پەیوەندییەکانی دەرەوەی پارتی داوای کرد کە ڕێکخراوە جیهانییەکان لە ڕێگەی پڕۆژەی بچووک و مامناوەندییەوە هەوڵی تواناسازی بدەن بۆ دۆزینەوەی هەلی کار و خزمەتگوزاری و فێربوون، تاکو ئاوارەکان بە سەربەرزانە بگەڕێنەوە و ژیانی ئاساییی خۆیان بەڕێ بکەن. ڕاستە حکوومەتی هەرێم هەموو توانایەکی خستووەتە گەڕ بۆ پاراستنی تەندروستی و پێشکەشکردنی چەندین خزمەتگوزاری و پڕۆژەی تر بۆ باشترکردنی ژیان و گوزەرانیان، بەڵام پێوستی بە هاوکاریی زیاتری کۆمەڵگای نێودەوڵەتی هەیە.



بەڕێز دەیڤد میۆلەر، بە ناوی شاندی یاوەر و دەزگای ئۆیکۆسی ئەڵمانی سوپاسی ئەو پێشوازی و هاوکاریانەی کرد کە وەک ئاسانکاری بۆ کارەکانیان پێشکەشیان کراوە. بەڕێز دەیڤد سەقامگیری و پیشکەوتنەکانی هەرێم و هاوکاریکردنی ئاوارە و لێقەوماوانی شەڕی داعشی بە کەلتوورێکی جوان و پیرۆز وەسف کرد و گوتی، کەلتووری بەرزی لێبووردەیی و پێکەوەژیان لە هەرێمی کوردستان بەرامبەر سەرجەم ئایین و نەتەوە جیاوازەکان جێگای ڕێز و پێزانینە. بەڕێزیان ڕایگەیاند، دەزگاکەیان پردێکی پەیوەندیی بەهێزی دامەزراندووە لە نێوان هەرێمی کوردستان و ئەڵمانیای فیدراڵدا بۆ ئاشنابوون بە دۆخی هەرێمی کوردستان و گەیاندنی دەنگ و داخوازییەکانی پێکهاتەکانی هەرێمی کوردستان و ناوچەکە و خوازیارن لە ڕێگەی حکوومەتی هەرێمی کوردستانەوە پڕۆژەکانیان فراوانتر بکەن.



هۆشیار سیوەیلی ئامادەییی مەکتەبی پەیوەندییەکانی دەرەوەی (پ.د.ک)ی دووپات کردەوە بو هەموو هاوکاری و ئاسانکارییەک، تاکو دەزگای ئۆیکۆس