هێرشێکی مووشەکی کرایە سەر بنکەی سەربازیی کەی وەن لە کەرکووک کە سەربازی ئەمریکی تێدا جێگیرە.

تاوەکو ئێستا هیچ ئامارێک نییە لەبارەی کەوتنەوەی قوربانی بەهۆی هێرشەکەوە لە ئاسمانی کەرکووک دەنگی فڕۆکە دەبیسترێت.

ئێوارەی رۆژی هەینی 27-12-2019 چەند مووشەکێک لە سەربازگەی کەی وەن لە کەرکووک کەوتنەوە، لە هێرشەکەدا بەڵێندەرێکی ئەمریکی کوژرا و چوار سەربازی دیکەش برینداربوون.

سەربازگەی کەی وەن دەکەوێتە رۆژئاوای كەركووك و پێش رووداوەکانی 16ی ئۆکتۆبەری 2017 بارەگای میحوەری چواری هێزەکانی پێشمەرگە بوو، ئێستاش هێزەکانی پۆلیسی فیدراڵی، هێزەکانی ئەمریکا و دژەتیرۆری عێراق و چەکدارانی حەشدی شەعبی تێدان.

دوای هێرشە مووشەکییەکەی سەر بنکەی کەی وەن، رۆژی یەکشەممە 29-12-2019 ئەمریکا هێرشی ئاسمانی بۆسەر پێنج بنکەی کەتایبی حیزبوڵڵا لە سووریا و عێراق ئەنجامدا.

ئەو پێنج بنکەیەی ئەمریکا کردنیە ئامانج، سیانیان لە عێراق و دوو بنکەکانی دیکەش لە سووریا بوون، لەنێو بنکەکاندا کۆگای چەک هەبووە و لەو بنکانەوە پلانی هێرشکردنەسەر بنکەی سەربازیی هاوپەیمانان لە عێراق داڕێژراوە.

رۆژی 31-12-2019 لایەنگرانی حەشدی شەعبی لە بەغدا هێرشیان کردە سەر باڵیۆزخانەی ئەمریکا و یەکێک لە پرسگەکانی باڵیۆزخانەکە سوتێندرا و داوای داخستنی باڵیۆزخانەکە کرا.

بەرەبەیانی رۆژی هەینی 03-01-2020 لە بۆردوومانێکی فڕۆکەکانی ئەمریکا، قاسم سولەیمانی، فەرماندەی فەیلەقی قودس و ئەبومەهدی موهەندیس، جێگری سەرۆکی دەستەی حەشدی شەعبی و ژمارەیەک فەرماندەی ئێرانی و حەشدی شەعبی کوژران.

دوای کوژرانی قاسم سولەیمانی، گرژیی و ئاڵۆزییەکانی نێوان ئێران و ئەمریکا گەیشتە لووتکە، بەشێوەیەک کە راستەوخۆ هێرشی زارەکییان دەکردە سەر یەکدی و هەڕەشەی هێرشکردنە سەر بنکە و بارەگاکانی یەکدییان دەکرد.