گوتەبێژی بەڕێوەبەرایەتیی پۆلیسی گەرمیان، دەستگیركردنی پێنج هاووڵاتیی بە دراوی ساختەوە لە شارەدێی ڕزگاریی سەر بە قەزای كەلار ڕاگەیاند.

موقەدەمی مافپەروەر عەلی جەمال قدووری، گوتەبێژی بەڕێوەبەرایەتیی پۆلیسی گەرمیان، ڕايگەیاند: "هێزەكانی بەشی نەهێشتنی تاوانی گەرمیان دوای وەرگرتنی زانیاریی ورد و چاودێریكردنی تەواو، توانیان لە شارەدێی ڕزگاریی سەر بە قەزای كەلار 5 هاووڵاتی لەكاتی مامەڵەكردن بە بڕێك دراوی ساختەی عێراقی و ئەمریكییەوە دەستگیر بكەن".

گوتیشی: "چوار لە دەستگیركراوەكان ئەندامی یەك خێزانن و بەنیاز بوون لەنێو بازاڕی شارەدێكەدا دراوە ساختەكە ساغ بكەنەوە".

ئاماژەی بەوەش دا "ئێستا بە بڕیاری دادوەر و بەپێی مادەی 281 ی یاسای سزادانی عێراقی بەند كراون و لێكۆڵینەوە لەو بارەیەوە بەردەوامە".











باسنيوز