بەپێی ئامارێک هێزە ئەمنییەكانی كەركووك لە ماوەی یەك ساڵی ڕابردوودا لە ناوەندی شار زیاتر لە 500 كەسیان دەستگیر كردووە كە زۆربەیان بە تۆمەتی تیرۆر بوون.

بەپێی ئامارێک كە لیوای 61 بڵاوی كرددووەتەوە و هێزێکی تایبەتی سەر بە ئەنجومەنی وەزیرانی عێراقە، لە یەک ساڵدا لە گەڕەك و ناوچە جیاوازەكانی شاری كەركووك، چەندین هەڵمەتی گەڕان و پشكنین ئەنجام دراون و بەو هۆیەوە، جگە لە دەستگیركردنی زیاتر لە 500 کەس، دەستیش بەسەر چەندین پارچە چەک و تەقەمەنی و ماددەی هۆشبەر و كەلوپەلی دزراودا گیراوە.

بەپێی هەمان ئامار، لە یەک ساڵی دەستبەكاربووناندا لە كەركوك، توانیویانە 333 كەس بە تۆمەتی تیرۆر دەستگیر بكەن، كە دەستیان سوور بووە بە خوێنی هاووڵاتیانی بێتاوان و بەشێك لەوانەش ئەمیری داعش بوون، چونكە ئێستا داعشێكی زۆر روویان لە شاری کەرکووک كردووە".

جیا لەو 333 کەسە، ئەوانی دیکە هەر یەكەیان بە تۆمەتی دزی و فرۆشتنی مادەی هۆشبەر و چەند مادەیەكی دەستگیر كراون.

ڕۆژانە کەسانی تۆمەتبار بە کردەوەی تیرۆر و چەكداری داعش لەناو شاری كەركووك دەستگیر دەكرێن و وێنەكانیشیان بە دەموچاو داپۆشراوی بڵاو دەكرێتەوە، كە بەشێكیان بە ئەمیر و سەركردەی ئەو ڕێكخراوە ناو دەبرێن.

پاش رووداوەكانی 16 ئۆكتۆبەر و نەمانی هێزی پێشمەرگە و ئاسایش لە كەركووك، زیاتر لە دوو ساڵە ناوچەكانی دەوروبەری كەركوك کە پێشتر لەژێر دەستی داعشدا بوون، كۆنتڕۆڵ كراونەتەوە، بەڵام هێزە ئەمنییەکانی عێراق و حەشدی شەعبی توانایی دابینکردنی ئاسایشی ناوچە کوردستانییەکان و بەتایبەت کەرکوکیان نییە و ناوبەناو رووداوی ئەمنی لەو سنوورانە دووپات دەبنەوە و نەیانتوانیوە وەك پێویست بەرگری لە شارەكە و دانیشتوان پێكهاتەكانی بكەن.












باسنيوز