سه‌فین دزه‌یی، به‌رپرسی فه‌رمانگه‌ی په‌یوه‌ندییه‌كانی ده‌ره‌وه‌ی حكوومه‌تی هه‌رێمی كوردستان كه‌ ئه‌ندامی شاندی حكوومه‌تی عێراقه‌ له‌ كۆبوونه‌وه‌ی گشتی نه‌ته‌وه‌یه‌كگرتووه‌كان له‌ نیویۆرك له‌ لێدوانێكی تایبه‌تدا بۆ كوردستان24 رایگه‌یاند، زۆر كۆبوونه‌وه‌ی پۆزه‌تیڤییان ئه‌نجامداوه‌ و له‌ زۆربه‌ی كۆبوونه‌وه‌كانیش سه‌رۆكی وڵاتان نیگه‌رانی خۆیان نیشانداوه‌ به‌رامبه‌ر به‌ ئه‌گه‌ری سه‌رهه‌ڵدانه‌وه‌ی داعش له‌ ناوچه‌كه‌.

ئاشكراشی كرد، له‌نێو كۆبوونه‌وه‌كان باس له‌وه‌ كراوه‌ كه‌ ئێستاكه‌ كه‌شێكی ئه‌رێنی له‌نێوان هه‌ولێر و به‌غدا بۆ چاره‌سه‌ركردنی سه‌رجه‌م كێشه‌ هه‌ڵپه‌سێردراوه‌كان دروست بووه‌.

ئاماژەی بەوەشدا، وڵاتان پێشوازیان لە چارەسەرکردنی کێشەکانی نێوان هەولێر و بەغدا بە رێگای دیالۆگ کرد.

سەفین دزەیی، نوێنەری حکوومەتی هەرێمی کوردستان لەگەڵ سه‌رۆك كۆماری عێراقی فیدراڵ، به‌رهه‌م ئه‌حمه‌د ساڵح بەشدارن لە كۆمه‌ڵه‌ی گشتی نه‌ته‌وه‌یه‌كگرتووه‌كان له‌ نیویۆرك و دوێنێ چوارشەممەش لەگەڵ دۆناڵد ترەمپ، سەرۆکی ویلایەتە یەکگرتووەکانی ئەمەریکا کۆبوونەوە.




K24