سکرتێری مەکتەبی سیاسیی پارتی دیموکراتی کوردستان داوای دروستکردنی زۆنێکی یەکگرتووی زەیتوونیی کوردستانی دەکات.

فازڵ میرانی، سکرتێری مەکتەبی سیاسیی پارتی لە لێدوانێکدا بۆ (رادیۆی دەنگی ئەمریکا)، رایگەیاندووە، بەرژەوەندیی کوردستان و خوێنی شەهیدان لە کەسایەتییەکانی حزبەکان گرنگترە.

فازڵ میرانی رەتی دەکاتەوە پارتی و یەکێتی شەڕی ناوخۆیی بکەنەوە و رایگەیاندووە، لەناو هەردوو حزبدا کەسانی ماندوو لە سەرکردایەتی هەن، کە دوای خوێنی شەهیدان، ئەوان بوونەتە هۆکاری دروستبوونی ئەزموونی کوردستان و بە ئاسانی و بە ”شتێکی بچووک“ ئەو ئەزموونە ”تێک نادەن“.

سکرتێری مەکتەبی سیاسیی پارتی ئاماژە بە بوونی خاڵی جیاوازیی زۆر لەنێوان پارتی و یەکێتی دەکات، بەڵام جەخت لەوە دەکاتەوە، کە خاڵی هاوبەشیشیان ”ئێجگار زۆرە“.

فازڵ میرانی دژایەتیی خۆی بۆ زۆنی زەرد و سەود رادەگەیەنێت و داوا دەکات ”لە بری دوو زۆن، کوردستان بکرێتە “زۆنی زەیتوونی“ و رایگەیاندووە، ” ئێمە هەر چواردەورمان ئاگرە بەهەرلایەکدا با بێت ئاگرەکە بەر ئێمە دەکەوێت بۆ بەدبەختی ئێمە با-یەکە بەوجۆرە نایەت کە ئاگرەکە لە ئێمە دور بخاتەوە“.

میرانی لە رووی مەبدەئەوە پشتگیریی دامەزراندنی ئەنجومەنێکی سیاسیی بۆ کوردستان دەکات، کە لە کەسی یەکەمی حزبەکان پێک بێت و ئەوان راسپاردە بۆ بەهێزترکردنی ئەزموونی کوردستان، بدەنە پەرلەمان و حکوومەتی هەرێمی کوردستان.

لەبارەی سەرۆکایەتیی ئەنجومەنەکە، سکرتێری مەکتەبی سیاسیی پارتی رایگەیاندووە، سەرۆک بارزانی ئەزموونی زۆرە لەو بارەیەوە و باشترین کەسە بۆ سەرۆکایەتیی ئەنجومەنەکە و رایگەیاندووە، حزبەکان بە پارتیشەوە پێویستییان بە سەرۆک بارزانییە نەک بە پێچەوانەوە، ”ئێمە دەبێ خەڵک بۆ پۆست و ئیش بدۆزینەوە نەک پۆست و ئیش بۆ خەڵک بدۆزینەوە و جەنابی سەرۆک بارزانی ئەگەر پۆست و ئیش پێویستی بەو نەبێت، ئه‌و پێویستی به‌ ئیش و پۆست نیە“.








باسنیوز