بەڕێوەبەری کەمپەکانی خازر دەڵێ، دوای ئەوەی لە ماوەی ڕابردوودا ژمارەیەکی زۆری ئاوارەکان گەڕانەوە مووسڵ، ئێستا دووبارە ئاوارەی ھەرێمی کوردستان دەبنەوە.

ڕزگار عوبێد، بەڕێوەبەری کەمپەکانی خازر، بە ماڵپەڕی فەرمیی پارتی دیموکراتی کوردستانی ڕاگەیاند: "دوای ئازادکردنی مووسڵ و دەوروبەری لە دەستی داعش ئاوارەکانی کەمپەکان دەستیان بە گەڕانەوە کرد، بەڵام لە ساڵی ڕابردووەوە جارێکی دیکە ئاوارەی ھەرێمی کوردستان دەبنەوە و دەگەڕێنەوە بۆ کەمپەکان بە جۆرێک کە ساڵی ڕاِبردوو ٨٠٠ خێزان گەڕاونەتەوە و ئەمساڵیش ڕۆژانە ١٠ بۆ ١٥ خێزان ئاوارەی ھەرێمی کوردستان دەبنەوە."

ڕزگار عوبێد گوتیشی: "دوو ھۆکاری سەرەکی ھەیە بۆ دووبارە ئاوارەبوونەوەی خەڵکی مووسڵ، ئەوانیش نەبوونی خزمەتگوزاری و تێکچوونی دۆخی ئەمنی و بەتایبەتیش ترس لە ھێزە میلیشیاکانی حەشدی شەعبی، چونکە ھەست بە ئارامی ناکەن و تەعدایان لێ دەکرێت، بۆیە پێیان خۆشە ئاوارە بن، نەک بەو شێوەیە بژین."

عوبێد باسی لەوەش کرد: "ھەرکاتێک ئاوارە دەبنەوە ئێمە پێشوازییان لێ دەکەین و ھەموو پێداویستییەکیشیان بۆ دابین دەکەین، بەڵام حکوومەتی عێراق ھیچ ھاوکارییەکیان ناکات."

kdp-