ئەندامێکی جڤاتی نیشتمانیی گۆڕان داوا دەکات، ”کارێک نەکرێت“ کە ئەو متمانەیەی بە کۆبوونەوەکان درووست بووە، کاڵ ببێتەوە.



ھێمن شێخانی، ئەندامی جڤاتی نیشتمانی و بەرپرسی مەکۆی گۆڕان لە ھەولێر ڕاگەیاند: ھیچ وادەیەک بۆ کۆبوونەوەی نێوان گۆڕان و پارتی دیاری نەکراوە، بەڵام بێگومان بە ھەماھەنگیی هەردوو بڕیار دەدرێت“.



لەبارەی کۆبوونەوەی سێقۆڵیی نێوان پارتی، گۆڕان و یەکێتی، ئەو بەرپرسەی بزووتنەوەکە گوتی: ”ئەوە تەواوکەری کۆبوونەوەکانی دیکە دەبێت“.



لە بەشێکی دیکەی قسەکانیدا هێمن شێخانی داوای کرد کە لایەنەکان کارێک نەکەن، تاوەکوو ”ئەو متمانەیەی لە نێوانیاندا هەیە بۆ کۆبوونەوەکان، کاڵ نەبێتەوە“.



دووپاتیشی کردەوە: ”ئامانجی گۆڕان کارکردنە لەسەر بەرنامەی کاری کابینەی داھاتووی حکوومەت، کاتێک باسی پۆستیش دەکەین، ئیستیحقاقی خۆمانە و پێمان وایە داینەمۆی جێبەجێکردنی بەرنامەی کارەکەیە“.



باسنيوز