بەڕێوەبەرایەتیی پۆلیسی سلێمانی لە ڕاگەیاندراوێکدا ئاشکرای کرد، کەسێک بە تۆمەتی کوشتنی ھاووڵاتییەک، لە سنووری سلێمانی دەستگیر کراوە.

ئەمڕۆ سێشەممە 29/1/2019، بەڕێوەبەرایەتیی پۆلیسی سلێمانی ڕاگەیاندراوێکی لە پەیجی فەرمیی خۆی، لە تۆڕی کۆمەڵایەتیی (فەیسبووک) بڵاو کردەوە، تێیدا ھاتووە: "ڕۆژی 19/6/2018، ھاووڵاتی (ە، س، ح) لەدایکبووی 1993، لە شارەدێی (گەرمک)ی سەر بە شارۆچکەی پێنجوێن بە فیشەک کوژرا".

ئاماژە بەوەش دراوە: "دوای گەیشتنی ھێزەکانی پۆلیس و تیمەکانی بەشی پۆلیسی بەڵگەی تاوان، کەشف و ھێڵکاری بۆ شوێنی ڕووداوەکە کرا و لێکۆڵینەوەکان دەستیان پێ کرد و سەرجەم بەڵگە و سکاڵاکان کۆ کرانەوە، سەرئەنجام ڕۆژی 28/1/2019 دادوەر فەرمانی دەستگیرکردنی بۆ تۆمەتبار (ی، ڕ، خ) لەدایکبووی 1995 دەرکرد".

پۆلیسی سلێمانی ڕوونیشی کردەوە: "دوای بەدواچوونی ھێزەکانی پۆلیس توانرا ئەمڕۆ سێشەممە 29/1/2019، ھێزەکانی بنکەی پۆلیسی (گەرمک) ئەو تۆمەتبارەیان دەستگیر کرد."

لە ڕاگەیاندراوەکەدا ئەوەش خراوەتە ڕوو، ئێستا بە فەرمانی دادوەر و بەپێی ماددەی 406 لە یاسای سزادانی عێراقی، تۆمەتبارەکە ڕاگیراوە و پەڕاوی لێکۆڵینەوە لەلایەن بنکەی پۆلیسی (گەرمک) بۆ تۆمەتبار کراوەتەوە".











باسنيوز