ئه‌مڕۆ شه‌ش فراكسيۆنى كوردستانى به‌ سه‌رپه‌رشتى به‌شير حه‌داد، جێگرى سه‌رۆكى ئه‌نجوومه‌نى نوێنه‌رانى عێراق كۆبوونه‌وه‌.

دواى كۆبوونه‌وه‌كه‌، راگه‌يه‌ندراوێكى هاوبه‌شيان بڵاوكرده‌وه‌ و كوردستان24 وێنه‌يه‌كى ئه‌و راگه‌يه‌ندراوه‌ى به‌ده‌ستگه‌يشتووه‌، كه‌ تێيدا لايه‌نه‌كان  رايانگه‌ياندووه‌، هه‌موويان كۆكن له‌سه‌ر ئه‌م خاڵانه‌:

يه‌كه‌م: فراكسيۆنه‌ كوردستانييه‌كان پشتيوانى له‌ داواى پارێزگاكانى به‌سره‌ و نه‌ينه‌وا ده‌كه‌ن.

دووه‌م: هه‌وڵه‌كانيان ده‌خه‌نه‌گه‌ڕ بۆ به‌ده‌ستهێنانى مافه‌كانى خه‌ڵكى هه‌رێمى كوردستان و ناوچه‌ دابڕێندراوه‌كان، به‌ تايبه‌تى له‌ پرسى بودجه‌ و له‌م رووه‌شه‌وه‌ داوا له‌ هه‌ردوو لاى حكومه‌تى هه‌رێم و حكومه‌تى فيدراڵ ده‌كه‌ن، پابه‌ند بن به‌ ياساى بودجه‌ى عێراقه‌وه‌ دواى په‌سندكردنى.

سێيه‌م: جه‌ختيان له‌سه‌ر گرنگى هه‌ماهه‌نگى نێوان نوێنه‌رانى كورد و حكومه‌تى هه‌رێم و كاربه‌ده‌ستانى كورد له‌ به‌غدا كرده‌وه‌.

چواره‌م: فراكسيۆنه‌ كوردستانييه‌كان كۆك بوون له‌سه‌ر گرنگى شه‌فافيه‌ت له‌ دۆسيه‌ى نه‌وتى عێراق و هه‌رێمى كوردستان و ناوچه‌ دابڕێندراوه‌كان و هه‌وڵدان بۆ باشكردنى په‌يوه‌ندييه‌كانى نێوان هه‌رێم و به‌غدا.

پێنجه‌م: فراكسيۆنه‌ كوردستانييه‌كان رێككه‌وتن له‌سه‌ر به‌رده‌وامى كۆبوونه‌وه‌ هاوبه‌شه‌كان به‌ شێوه‌يه‌كى مانگانه‌ بۆ ئه‌وه‌ پرسانه‌ى كه‌ په‌يوه‌ستن به‌ ژيانى خه‌ڵكى هه‌رێمى كوردستان و ناوچه‌ دابڕێندراوه‌كان.

ئه‌م فراكسيۆنانه‌ له‌ كۆبوونه‌وه‌كه‌دا به‌شدار بوون و واژوويان له‌سه‌ر ئه‌م خاڵانه‌ كردووه‌:

پارتى ديموكراتى كوردستان

يه‌كێتى نيشتمانى كوردستان

بزووتنه‌وه‌ى گۆڕان

هاوپه‌يمانى ديموكراسى و دادپه‌روه‌رى

يه‌كگرتووى ئيسلامى كوردستان

كۆمه‌ڵى ئيسلامى كوردستان
k24-