هێزەکانی سووریای دیموکراتی (هەسەدە) رایدەگەیەنێت، کە هەوڵ دەدەن لەگەڵ تورکیا بگەنە چارەسەرێک بۆ رەوشی رۆژئاوای کوردستان و باکووری سووریا.

هەروەک لە بەیاننامەکەی هەسەدەدا هاتووە، هەسەدە هەموو هاوکارییەکی تورکیا دەکات بۆ دامەزراندنی ناوچەیەکی ئارام لە سنووری نێوان رۆژئاوای کوردستان و تورکیا ”هەوڵ دەدەین لەگەڵ تورکیا بگەینە چارەسەر“.

نەرمی نواندنی هەسەدە بەرامبەر تورکیا دوای ئەوە دێت، کە دۆناڵد ترەمپی سەرۆکی ئەمریکا هۆشداریی دایە تورکیا لە هێرشکردنە سەر رۆژئاوای کوردستان و داواشی لە هەسەدە کرد، هیچ هەنگاوێک دژی تورکیا نەگرێتە بەر.

دۆناڵد ترەمپ هەروەها رایگەیاند، بۆ دوورخستنەوەی ئەگەری پێکدادانی سوپای تورکیا و هەسەدە، ناوچەیەکی ئارام بە قوڵایی 20 کیلۆمەتر لە رۆژئاوای کوردستان دروست دەکەن و تورکیاش پێشوازیی لەو هەنگاوە کرد.

هەسەدە هێزێکی سەربازییە و بە پشتیوانیی ئەمریکا بۆ رزگارکردنەوەی ناوچە داگیرکراوەکانی رۆژئاوای کوردستان و سووریا لە رێکخراوی تیرۆریستی داعش، پێکهاتووە. یەکینەکانی پاراستنی گەل (یەپەگە)ی باڵی سەربازیی پارتی کرێکارانی کوردستان (پەکەکە) لە رۆژئاوی باڵی سەرەکیی ئەو هێزەیە.












باسنيوز