پاش ئه‌وه‌ى ڕێكخراوى ژینگه‌پارێزى گه‌رمیان داوای له‌ ئیداره‌ى گه‌رمیان كرد له‌پێناو چاكه‌ى گشتى و ته‌ندروستى هاووڵاتیاندا بڕیارێك له‌باره‌ى سه‌ربڕخانه‌ى كه‌لار بدرێت و چاره‌سه‌رێكى ڕیشه‌یی بۆ بدۆزرێته‌وه‌، قایمقامیه‌تى قه‌زاى كه‌لار و لایه‌نه‌ په‌یوه‌ندیداره‌كان له‌ كێشه‌كانى سه‌ربڕینخانه‌كه‌یان كۆڵییه‌وه‌ و ژماره‌یه‌ك بڕیاریان له‌وباره‌یه‌وه‌ دا.

 

سیروان حه‌سه‌ن، به‌رپرسی ڕاگه‌یاندنى قایمقامیه‌تى كه‌لار، ڕاگه‌یاند : "قایمقامى كه‌لار به‌ یاوه‌رى سه‌رۆكى شاره‌وانییه‌كانى گه‌رمیان و به‌ڕێوه‌به‌رى ڤێتێرنه‌رى گه‌رمیان و سه‌رۆكى شاره‌وانى كه‌لار، سه‌ردانى سه‌ربڕینخانه‌ى كه‌لاریان كرد و له‌ كێشه‌ و گرفته‌كانیان كۆڵییه‌وه‌ و ژماره‌یه‌ك بڕیارى گرنگیان له‌وباره‌یه‌وه‌ ده‌ركرد".

 

گوتیشی: "بڕیاره‌كان بریتین له‌ درووستكردنى ژوورێكى تایبه‌ت به‌سه‌ربڕینى ڕه‌شه‌وڵاخ و په‌رژینێكى تایبه‌ت به‌ئاژه‌ڵى بچووك و ڕێكخستنه‌وه‌ى شێوازى بردنه‌ژووره‌وه‌ى ئاژه‌ڵ و سه‌ربڕین و ده‌رهێنانه‌وه‌ى به‌شێوه‌یه‌كى ته‌ندرووست".

 

ڕوونیشیكرده‌وه‌ "هه‌روه‌ها بڕیاردراوه‌ به‌دانانى حاویه‌ له‌به‌رده‌م سه‌ربڕینخانه‌كه‌ بۆ كۆكردنه‌وه‌ى پاشه‌ڕۆ تێیدا و كۆمپانیاى پاككه‌ره‌وه‌ش بانگهێشتبكرێت بۆئه‌وه‌ى له‌مه‌ودوا به‌پێى ڕێنمایی و گرێبه‌سته‌كه‌ى كاره‌كانى ئه‌نجام بدات".
bas news-