حەشدا شەعبی هندەك شوونوارێن مەسیحیان ل باشیكێ ژناڤ دبەت
محەمەد عارف تەتار، شوونوارناسێ قەزا شێخان، دیار كر، هژمارەكا زۆر یا شوونواران ل دەڤەرا باشیك سەر ب قەزا شێخان ڤە هەنە و بەری روودانێن 16 ئۆكتۆبەرێ هەموو ژلایێ پێشمەرگەی ڤە هاتبوونە پاراستن، بەلێ پشتی روودانێن 16 ئۆكتۆبەرێ و ئەو شوونوارە كەفتینە ژێر دەستێ حەشدا شەعبی، هژمارەكا زۆر ژ وان شوونواران ژلایێ حەشدا شەعبی ڤە ژناڤچووینە.
تەتار ئاشكرا ژی كر، هەردوو شوونوارێن (خورسەبات و گرێ بایبوختێ) ب تمامی ژلایێ حەشدا شەعبی ڤە هاتینە ژناڤبرن و ئەڤ هەردوو شوونوارە بۆ بەری زێدەتر ژ 3 هزار سالان ڤەدگەرن ل دەمێ دانانا ئیمپراتۆریەتا ئاشووری.
گۆتژی: دەمێ پێشمەرگێن قارەمان باشیك ژ دەستێن تیرۆرستێن داعش رزگاركری، گەلەك پارچێن شوونواری یێن نوو ڤەدیتن و هەلگرتن و چاڤدێری لێ دكر، بەلێ ئەو ژی هەموو ژلایێ حەشدا شەعبی ڤە هاتینە ژناڤبرن.
شوونوارناس محەمەد عارف تەتار ئەو یەك ژی گۆت كو رێڤەبەریا شوونواران ل مووسل ل سەر ژناڤبرنا ڤان شوونوارێن مەسیحیان ل باشیكێ یا ئاگەهدارە، بەلێ هەتا نۆكە چو پێنگاڤ بۆ پاراستنا وان نەهاڤێتینە.
باسنیوز
