ئەمینداری گشتیی وەزارەتی پێشمەرگەی هەرێمی کوردستان ئاشکرای کرد، هەردوو وەزارەتی پێشمەرگە و بەرگریی حکوومەتی عێراق، ”بە شێوەیەکی سەرەتایی“ لەسەر گەڕانەوەی هێزە هاوبەشەکانی پێشمەرگە بۆ ناوچە کوردستانییەکان ڕێککەوتوون.

فەریق جەبار یاوەر، ئەمینداری گشتیی وەزارەتی پێشمەرگە ڕايگەیاند: ”ئێمە چاوەڕێی شاندێکی وەزارەتی بەرگریی عێراقین کە بێن، تاوەکوو کۆبوونەوە لە نێوان ھەردوو وەزارەتی بەرگریی عێراق و پێشمەرگەی ھەرێمی کوردستان لەبارەی گەڕانەوەی هێزەکان ئەنجام بدەین“.

ئەوەشی ئاشکرا کرد: ”مەبدەئیەن ھەردوولا بڕیارمانداوە و ڕەزامەندین لەسەر گەڕاندنەوەی پرۆسەی کاری ھاوبەشی ئەمنی و سەربازی، لە ھەموو ئەو ناوچانەی کە ئێستا جموجوڵی داعشی تێدایە لە خانەقینەوە تا دەگاتە شنگال، واتە ھەموو ناوچەکانی دیالە، سەلاحەدین، کەرکووک، مەخموور و مووسڵ“.

دووپاتیشی کردەوە کە ھێشتا ھیچ کۆبوونەوەیەکیان نەکردووە، بەڵام ”کۆبوونەوەی لەسەر دەکەین و دواتر لەسەر وردەکاریی ئەم بابەتە قسە دەکەین“.










باسنيوز