شاندێکی رۆژئاوای کوردستان، کە بە سەردانێک گەیشتووەتە هەولێری پایتەختی هەرێمی کوردستان، داواکارییەک ئاراستەی سەرۆک بارزانی دەکات.

بەپێی راگەیەندراوێکی بارەگای بارزانی، ئەمڕۆ پێنجشەممە 10-1-2019، سەرۆک مەسعود بارزانی پێشوازیی لە شاندێکی سەرکردایەتیی ئەنجومەنی نیشتمانیی کورد لە سووریا (ئەنەکەسە) کردووە.

لە کۆبوونەوەیەکدا، وێڕای تاوتوێکردنی بارودۆخی رۆژئاوای کوردستان، شاندەکەی سەرکردایەتیی ئەنەکەسە باسی بارودۆخی کورد لە سووریا و نیگەرانییەکانیان لەبارەی ئایندەی کورد لەو وڵاتە، بۆ سەرۆک بارزانی کردووە.

شاندەکەی سەرکردایەتیی ئەنەکەسە سوپاسی ”پشتیوانیی و خەمخۆریی“ سەرۆک بارزانییان بۆ گەلی کورد لە سووریا کردووە و داوایان لێ کردووە ”دەنگ و مەزلوومیەتی گەلی كورد بە ناوەندە دیپلۆماسی و دەولییەكان بگەیێنێت“.

هەروەک لە راگەیەندراوەکەدا هاووە، سەرۆک بارزانی رێنمایی و ئامۆژگاریی پێویستی بۆ شاندەکە لەبارەی مامەڵەکردن لەگەڵ پێشهاتە نوێیەکان و پاراستنی گەلی کورد لە سووریا خستووەتە روو.












باسنيوز